Bilen blei taua ned på E39 Halhjemsvegen. Førar var uskadd. (Lesarbilde, foto: Gabriel Walden)

Utforkøyring på Moberg

– Eg bør kjøpa meg slepetau snart. Det er den fjerde bilen eg tauar ut av grøfta på éi veke, seier Gabriel.

Av: Kjetil Vasby Bruarøy

Det har kome påfyll av snø natt til torsdag, og i 10-tida torsdag formiddag hamna ein bil i grøfta på Moberg.

Bilen hadde kryssa brua over Halhjemsvegen, men klarte ikkje den krappaste delen av svingen ned mot E39.

– Førar var åleine i bilen og framsto som uskadd. Vi brukte litt tid på å få tak i slepetau, men etterkvart så fann ho eit i sitt eige bagasjerom, fortel Gabriel Walden Michelsen.

Han kom køyrande rett bak og tilbydde seg å hjelpa. Slepejobben gjekk fint, sett vekk frå at ein ambulanse delvis sto i vegen.

– Eg veit ikkje kvifor den kom, men den kom med blålys og parkerte framfor meg mens eg slepte. Det gjekk heldigvis fint likevel.

Taua fire bilar på éi veke

Den siste veka har Gabriel fått mykje bruk for firehjulstrekk på A6-en sin.

– Eg har hatt ein tendens til å vera «på feil plass til rett tid».

Det er faktisk den fjerde bilen eg tauar ut av grøfta på éi veke, seier Gabriel og ler.

– På tide å kjøpa seg slepetau, då?

– Ja, det er kanskje det.

Fleire saker