Utselt på éi veke

Musikar Stein Lyssand og restaurantsjef på Peppes Pizza Os, Fredrik Schult, står bak årets romjulsblues.

Konserten blir arrangert på Peppes laurdag 28. desember med Lyssand sitt band, Blue Note Shuffle bak mikrofonane.

– Blues i romjula har jo samla osingar i årevis, men vi visste ikkje at det kom til å ta sånn av, seier Fredrik.

I dag er det éi veke sidan han la ut billettane, og han har berre sju billettar igjen.

– Dei er reservert, men om ikkje dei blir henta i dag så ryker dei nok ut i morgon, trur han.

Vurderer å utvida

Med denne responsen skulle Fredrik ønskt at han hadde større plass.

– Det er ikkje kjekt for verken oss eller dei som ikkje får plass, men vi kan berre ta inn 150 gjestar.

– Eg har sett etter løysingar for å få veggar og tak rundt delar av uterestauranten, eit tett telt eller liknande.

– Førebels har eg ikkje funne nokon som kan ta jobben, men det er berre til å ta kontakt om du tar utfordringa, oppmodar han Midtsiden-lesarane.

– De har ikkje vurdert å kjøra ein tilleggskveld med blues eller annan livemusikk, då?

– Det er kanskje eit alternativ, men førebels har vi ikkje noko klart.