Utset øving for 500 soldatar

Om lag 500 soldatar tilknytt Bergenhus Heimevernsdistrikt 09 (HV-09) sine avdelingar skulle stilt på øving i løpet av den neste veka. Aktivitetane er no utsette.

– Grunna lokal smitteoppblomstring av koronaviruset, med reiseråd og øvrige restriksjonar, vert treningane våre i perioden frå og med 12. september til og med 21. september utsette, fortel sjef Bergenhus Heimevernsdistrikt 09, oberstløytnant Christoffer T. Knutsen.

• Les òg: Soldat smitta i Ulven leir

Avgjerda er tatt i samråd med HV-09 sin distriktslege og Fylkeslegen.

– Det er naudsynt at vi som beredskapsorganisasjon tek del i dugnaden no, stadfester distriktssjefen.

Aktivitetane som er utsette er opptaket til innsatsstyrke Bjørn West, Voss HV-område si skarpskyting i Voss herad og treningane til HV-områda Mongstad og Sture i kommunane Bjørnafjorden og Øygarden.

– Vi tar opp igjen øvingane våre når lokal smittespreiing er under kontroll. Soldatane som skulle vore på øving får melding på SMS og i Altinn, seier oberstløytnant Knutsen.

• Les òg: Elev smitta - klassetrinn i karantene