Utvida stenging av Søvikåsen

Lysefjordingane må belaga seg på å reisa om klosterruinane og Åsen til nærmare jul, om dei skal til Os eit ærend.

Tidlegare denne månaden fortalte Os kommune av Ole Bulls veg over Søvikåsen likevel ikkje ville opna 11. november, etter sju veker med stenging grunna arbeid med rassikring.

– Vi har enno ikkje greidd å få ned alle dei ustabile massane frå øvre del av rasløpet. Det er bratt og arbeidet er risikofylt, fortel Hege Bolstad frå Os kommune på vegne av selskapet som er hyra inn til å utføra jobben.

Tryggleiken er i fokus. Det er også årsaka til at det blei hyra inn helikopter til å spyla reinskingsområdet, ein prosess som var med på å letta arbeidet.

Stengt til 19. desember

Det ligg framleis både steinblokker og store røter i skråningen og geologen meiner meir må fjernast, eller sikrast.

– Siste delen av jobben, med montering av fangnettet, er altså ikkje starta.

Det er derfor utvida stenging av Søvikåsen fram til fredag 19. desember.