Utviding med positiv effekt
– Eg må nesten klypa meg i armen for å tru det er sant, seier dagleg leiar ved Ravneberghaugen Rehabiliteringssenter, Ranveig Klingsheim.
Bildeserie:
I august 2015 byrja dei å sprenga området som skulle gje senteret 1120 nye tiltrengte kvadratmeter.
Les meir: Storstilt utbygging på Ravneberghaugen.
– Eg følte at det tok så lang tid, men det har det jo faktisk ikkje gjort. For to månader sidan byrja vi å flytte inn i dei delane som var klare og har etterkvart tatt fleire og fleire rom i bruk, fortel Klingsheim.
Sjølv flytta ho inn på det nye kontoret sitt for ei veke sidan, og no gjenstår det berre litt montering før alt er klart.
– Slepp å eta på skift
Ravneberghaugen har fått eit nybygg i kvar ende, med treningssrom og styrkerom i eine enden. I det andre tilbygget, som er det største, har dei no blant anna fått ny kantine, fleire kontor og grupperom, aktivitetsrom, fellesstove og ni nye pasientrom.
– No slepp vi å eta på skift og ha møter der vi omtrent sit oppå kvarandre, seier Klingsheim, og fortel at det tidlegare har vore så trangt at det ikkje var haldbart.
– Vi har brukt alt av rom, kontor, til og med lagerrom har blitt brukt.
Fire av dei gamle romma som ikkje hadde toalett og dusj blir avvikla, og eit av romma har blitt gjort om til passasje mellom den gamle og nye delen, så totalt blir det fire fleire pasientrom enn før.
Arrangerer sommarferieopphald
– Dei ni nye pasientromma vil vi leiga ut til sommerferieopphald i to periodar, kvar på to veker, i juni-juli og i august.
Klingsheim forklarer at ordninga kan vera for nokon som sjølv skal på ferie og ønskjer at foreldra skal vera på ein trygg plass i mellomtida, eller eldre som ønskjer seg 14 dagar med luksus.
– Her får dei alle måltid, opplevingar og får vera med på alt det sosiale som skjer på senteret.
Får skryt frå pasientane
Dei to nye bygga balanserer nesten på kanten av stupet og med dei store vindauga og terrassane har både tilsette og pasientar ein fantastisk utsikt som strekkjer seg langt.
– Vi har hatt fokus på utsikten og har utnytta maksimalt av området vårt.
Tidlegare hadde Ravneberghaugen berre eit treningsrom, noko som skulle brukast til alle typar trening og undervising i tillegg. No har dei fått to nye trimrom, eit med maskiner og eit styrkerom.
– No kan vi ha fleire ting samtidig og vi har mykje større fleksibilitet.
Inne på det eine nye treningsrommet er pasientane i full gang med eigentrening.
– Dei er så fantastisk greie dei som jobbar her og opplegget er veldig bra, seier ei.
– Pluss litt til! kjem det frå andre del av salen.
– Betre tilbod til pasientane
Senteret har vore i full drift under byggeperioden og Klingsheim skryt av pasientane som har vore der i den tida.
– Dei har vore så støttande og engasjerte. No skal vi ta den tida vi treng til å bli kjent med det nye arealet, vi skal ikkje stresse.
At dei no har fått denne oppgraderinga betyr mykje for Klingsheim og resten av dei tilsette.
– Vi er veldig nøgd. det at vi har fått rom og plass nok gjev oss meir fleksibilitet og mange fleire moglegheitar og dermed får pasientane eit mykje betre tilbod.
Spennande? Vil du ha ukas høgdepunkt i innboksen?
Les meir om
Last ned Midtsiden-appen idag
No kan du følgja nyhende frå Os - rett i appen.
- Gratis å lasta ned
- Bli varsla straks noko skjer
- Tilgjengeleg i App Store og Google Play Store
For å få tilgang til alle sakene i appen må du vera abonnent.