Fredag var siste skuledag før påskeferien, søndag kom 15 cm tørr nysnø i Eikedalen og 10 cm i Furedalen på Kvamskogen.
I dag kom nye 5 centimeter med tørr nysnø.
– No er det meldt nedbør og 2-4 varmegradar onsdag, men det gjer ingenting. Vi har over 1 meter med snø, og er vi heldige så kjem noko av nedbøren onsdag som snø øvst i anlegget, seier dagleg leiar i Eikedalen Skisenter, Fredrik Tønjum.
Frå torsdag og ut påskeferien er det meldt opphaldsvêr og under 2 m/s i vindstyrke.
Torsdag til laurdag skal det dessutan bli letskya og sol. Spesielt torsdag og fredag er det behov for solkrem.
– God april kan kompensera for dårleg januar
Tønjum seier han knapt kan hugsa å ha hatt så gode forhold i midten av april før.
– Eg møter fleire som sa dei hadde pakka vekk skia for i år, men no henta dei fram igjen. Vi hadde ein dårleg start på året, men frå midten av februar har vi hatt fine forhold og godt besøk.
I 2019 hadde Eikedalen stengt i påsken. I 2020 var det fantastiske forhold, men pandemien stengte ned det meste, også skiheisane.
– No ligg vi an til å få den beste påsken på mange år, sjølv om påsken er sein. Det kan sjå ut som om ein god april vil kompensera for ein svak januar.
I januar hadde Eikedalen ope berre 9 dagar, og då med redusert mengde heisar. No er dei oppe i 77 opningsdagar.
Stolheisen skal vekk. For godt
Eit nytt skitrekk, Toppheisen, kom på plass i Eikedalen i år, og denne har ifølgje Tønjum fungert bra.
– Gjestane spreier seg fint i anlegget, så det blir lite kø. Og vi kan oftare ha ope opp til toppen av anlegget, når du no kan gå via Tvillingtrekket til både Fjellheisen og Toppheisen.
![Det nye heis- og løypekartet til Eikedalen. Stolheisen er vekke, Toppheisen er ny.](/_next/image?url=https%3A%2F%2Fcdn.sanity.io%2Fimages%2Fahcmq7tx%2Fproduction%2F18980a2fca2ef4e40510573e52c8272a483e3ec3-3600x2400.jpg%3Frect%3D0%2C121%2C3600%2C2159%26w%3D752%26h%3D451%26q%3D100%26dpr%3D2&w=3840&q=75)
Stolheisen trengte meir snø for at den kunne setjast i drift. Det blei vurdert å bygga denne om til ein kortare versjon, men det blir likevel ikkje aktuelt.
– Årsaka er at det kjem stadig strengare krav og reglar. I Sør-Europa må alle heisar som er eldre enn 30 år rivast, og Noreg plar ta etter Sør-Europa.
![Stolheisen står framleis, men er ikkje i drift og skal fjernast for godt. (Arkivfoto: KVB)](/_next/image?url=https%3A%2F%2Fcdn.sanity.io%2Fimages%2Fahcmq7tx%2Fproduction%2Fe3f0b56e38a5565f6dc08906560a0cd759d4c1d9-1140x760.jpg%3Frect%3D0%2C38%2C1140%2C684%26w%3D752%26h%3D451%26q%3D100%26dpr%3D2&w=3840&q=75)
Eikedalen risikerer dermed, om dei bruker rundt 15 millionar på å få dagens Stolheis godkjent igjen, at den må skrotast dagen etter. Ein ny stolheis vil truleg kosta 60-70 millionar.
– Investering av denne storleiken klarer vi ikkje å forsvara med den drifta vi har, så stolheisen blir ikkje erstatta av verken ombygd versjon eller noko nytt.