Vaksen veslebror

Bildeserie:

1 av 15

I år blei Tysnesfest arrangert for tredje år på rad, med utvida program og utvida artistbudsjett. Satsinga lønte seg, 12.500 gjestar er om lag 50 prosent meir enn venta, og ei vekst på 7000 i forhold til i fjor.

- Vi er veldig nøgd! seier Sigvard Madsen.

Madsen driv Mandelhuset på Våge og var blant dei som for nokre år sidan bestemte seg for å prøva å laga noko ekstra ut av den etablerte marknadsdagen.

- Laget Tysnesfest blei til, vi inviterte Vestlandsfanden til å halda konsert om kvelden etter marknaden, og det blei ein suksess. I fjor utvida vi til fredag til sundag og artistar som Stage Dolls, Tone Damli Aaberge og Vidar Johnsen og Peter Nordberg.

Liten plass - stor fest
Tysnes kommune hadde 2792 innbyggarar 1. januar i år. For 20 år sidan var det 2902 med fast adresse på naboøya vår i sør.

- Det er kjekt at det er så mange som vil koma på fest hos oss, eg trur arrangementet er god reklame for kommunen, seier Sigvard.

Tysnesingane er også tufast publikum, frå torsdag til sundag. Kurt Nilsen og resten av Hallelujah-gjengen hadde saman med ORBO & The Longshots 2400 publikummarar torsdag, Surferosa, også dei med osingar som oppvarmarar (Red Hot Cherry Poppers), lokka mellom 500 og 1000 til fest fredag, og Vassendgutane toppa saman med Rita Eriksen og Moving Oos med 3100 laurdag.

Innimellom store namn på kveldstid stiller Asgeir frå barne-TV og rapparane Erik og Kriss, superstjernen blant ungar og undgom, på scenen på dagtid for å underhalda på marknaden.

- Vi hadde til og med 420 på Helge Jordal sin Terje Vigen i Kjevikjo, på ein sundag, når du skulle tru folk eigentleg var trøytt og lei etter ei lang helg.

Litt for alle og full gass
Korleis klarar Tysnes å femdobla folketalet sitt på éi helg? For to veker sidan følte vi at Os var folksam, med rundt 3000 på blues- og jazzfestival og kanskje like mange på marknad og skulptursymposium.

Tysnes har mange båtturistar innan rekkevidd, men vi har om lag seks gongar så mange innbyggarar og ein god del kortare veg til storbyen Bergen.

- Eg trur det at folk sluttar veldig opp om Tysnesfest har mykje å bety, alle står ekstra på for å få dette til å bli bra. I tillegg legg vi som arrangerer dette vekt på å ha noko spennande å by på for flest mogleg, seier Madsen om suksessen.

Med 3000 til 4000 fleire gjestar enn venta på årets arrangement kan vi rekna med eit spenstig program også neste år.

- Vi kjem til å gje full gass vidare, stadfestar Sigvard Madsen.

I mellomtida bør nok både osingane og tysnesingane førebu seg på å bygga hamner med større kapasitet, gode fasilitetar for båtfolket er viktig om du har noko bra å by på sommarhalvåret.

Les om Tysnesfest på Tysnesbladet.no.