Stig Hansen og May Kristin Berg, som mottok sjekken på vegne av STIL. (Foto: KVB)
Stig Hansen og May Kristin Berg, som mottok sjekken på vegne av STIL. (Foto: KVB)

Valte ut 2 av 17 søkjarar

Desse får sponsormidlar frå Steinsenteret og Nordsjö Idé & Design.

Kjetil Vasby Bruarøy
10. februar 2020 - 11:49

I desember gjekk Steinsenteret og Nordsjö Idé & Design ut og etterlyste sponsormottakarar. Ikkje fordi dei hadde få søkjarar, men for å setja det i system.

– Det har blitt litt sponsing opp gjennom åra, men no ønskjer vi å få eit meir aktivt forhold til det, sa Stig Hansen, som saman med kollega Trond Didriksen løyvde 20.000 kroner til den eller dei av søkjarane som blei valt ut.

Frå musikk til pistol

Før søknadsfristen i januar gjekk ut, hadde dei to butikkane i Kolskogheiane mottatt 17 gode søknadar.

– Vi gjekk grundig gjennom alle, og det var mange gode tiltak og søknadar. Det blei vanskeleg å velja, og vi håper dei som ikkje får støtte av oss i denne runden, får napp andre stadar.

Blant søkarane var alt frå individuelle utøvarar til idrettslag, musikklag og pistolklubb.

– Målet vårt var å dela ut pengar som mange får glede av, seier Trond og Stig.

Ungdomsklubb og idrettslag

Dei enda med å velja to kandidatar som får 10.000 kroner kvar:

Søfteland Turn og Idrettslag og Lysefjorden Ungdomsklubb.

– Vi ønskjer med dette tilbodet å blåsa nytt liv i ungdomshuset i Lysefjorden. Hovudmålet er å skapa samhald mellom ungane i Lysefjorden, og éin fredag i månaden møtes borna i Lysefjorden til uformelle og kjekke aktivitetar på ungdomshuset, skriv leiarane i søknaden.

Målgruppa for klubbkveldane er tredje til sjuande klasse - sjakk, bordtennis og playstation er blant aktivitetane. Dei rundt 15 vaksne fortel at dei har ambisjonar om å utvida med fleire aktivitetar, som koding og e-sport.

Lysefjorden Ungdomsklubb opplever god respons, og vil utvida tilbodet. (Foto: Lysefjorden ungdomslag)
Lysefjorden Ungdomsklubb opplever god respons, og vil utvida tilbodet. (Foto: Lysefjorden ungdomslag)

Søfteland Turn og Idrettslag (STIL) fylte 100 år i fjor. Laget har rundt 350 medlemmar, dei fleste er under 16 år. Idrettslaget tilbyr trening innan fotball, friidrett, turn og innebandy.

STIL fekk mini-friidrettsbane i 2015, men har behov og planar om både utviding og fornying, blant anna av fotballbanen, som ligg i ei flaumsone.

Innandørs er kapasiteten begrensa til skulen sin gymsal. Idrettslaget jobbar med å etablere Søftelandsparken, med nytt fotballanlegg, garderobeanlegg, hallanlegg og ein sosial møteplass. 

– Området er sett av til idret og friluftsformål. Vi har brukt mykje pengar på planlegging, men det ser dessverre ut som om vi må finansiera dette utan hstøtte frå kommunen, seier May Kristin Berge.

Ho er leiar for turngruppa og medlem i styret, og tok imot gåvesjekken på vegne av idrettslaget.

– Desse kronene vil nok gå til vedlikehald, det er behov for skifte av minst eitt vindauge i klubbhuset. Vi har gode, lokale sponsorar, blant anna som kan utføra arbeidet, men vindauget må kjøpast, seier Berg.

 

Les meir om

Næringsliv