Vann for Arvid

Os tok imot Arna-Bjørnar til toppoppgjer på Kuventræ laurdag. Oppkøyringa til kampen blei ikkje heilt som venta då meldinga kom fredag kveld at banemeister Arvid Hjelle hadde gått bort etter ein hjartestans.

- Vi er ein liten fotballfamilie. Det er klart at meldinga om Arvid påverkar oss alle. Han var ein sentral del av miljøet på Kuventræ, seier Os-trenar Tim Henrik Sperrevik.

Arvid Hjelle blei minna med eitt minutt stille før kampstart laudag. Då kampen starta viste Os-spelarane at dei ville heidra banemeisteren også i kampen.

Os - Arna-Bjørnar 5-3 (3-2)
Målskårarar, Os: Erik Kanestrøm, Vegard Engelsen Moberg, Anders Kinden, Ramo Racic og Fredrik Heggland.

3 mål på 17 minutt

I løpet av dei første 17 minutta viste Os ein effektivitet av ypperste merke og gjekk opp i 3-0 ved Erik Kanestrøm, Vegard Engelsen Moberg og Anders Kinden.

Fellesnemnaren for alle dei tre skåringane var innlegg frå kanten.

- Vi fell bakpå når vi leiar og gjev dei for enkle sjansar, seier Sperrevik.

Arna-Bjørnar reduserer to gongar før pause.

Ny draumestart

Berre 1 minutt og 45 sekund ut i andre omgang er Ramo Racic frampå etter litt klabb og babb framfor Arna-Bjørnar-målet. Ballen sprett forbi keeper og i lengste hjørne.

- Ramo gjer ein fabelaktig jobb på topp i dag, meiner Sperrevik.

Fem minutt seinare søv Os-forsvaret litt og missar på markeringa på Arna-Bjørnar sin spelar Espen Fedje. Frå om lag 20 meter får han stå umarkert og fyra av mot Anders Kloven i Os-målet. Kloven, som er litt i ubalanse, er sjanselaus på skotet og må konstantera at Arna-Bjørnar reduserer.

Heggland på hovudet

Etter drygt 17 minutt ut i andre omgang får Os hjørnespark ved Erik Kanestrøm. Han legg ballen inn framfor mål, der ungguten Fredrik Heggland (16) ragar høgst og nikkar ballen kontant i mål.

Med sigeren over Arna-Bjørnar tok Os igjen over førsteplassen på tabellen, men Sandnes Ulf 2 har måndag sjanse til å klatra forbi.

SJÅ TABELLEN

Os - Arna Bjørnar 5-3 (3-2)
Gule kort: Os 1 (Tore Valvik), Arna Bjørnar 1
Os sitt lag: Anders Kloven, Stian Lunde, Torkel Hjertnes, Vegard Engelsen Moberg, Per Merai, Tore Valvik, Erik Kanestrøm, Anders Kinden (Christer Olsen frå 45. min), Simen Lassen, Fredrik Heggland (Håkon Kvittingen frå 89 min), Ramo Racic.

Søndag speler Os 2 heime mot Rosendal (kl 14).

Sjå Os sine mål og korleis Os-trenar Tim Henrik Sperrevik oppsummerer kampen (3:26 foto: Andris Hamre)