Varm og fin feiring i Vikjo

I dag er det St Hans, i går var det flott feiring av sankthansaftan i Mobergsvika.

Tradisjonen med feiring i Vikjo blei tatt opp igjen av Oseana i fjor, då var det rundt 1000 på felles feiring. I år var det meldt mykje regn, men meldingane blei betre, det gjorde vêret òg.

Oseana, Barnas Turlag Os og speidarane lagde til eit fin arrangement, med bål, felles grill, natursti, full scene og musikk av Os Spelemannslag og Os Durspelsamskipnad.

Brukte ny grillplass

I år var også sjølve Mobergsvika nyopprusta og klar til innrykk, med ny mur mellom bakkane og fjøra og ny grillplass, som fleire tok i bruk i går.

Familiefesten starta i 17-tida. Mellom 19.30 og klokka 20 byrja folk å trekka seg heimover, men fleire vaksne fann vegen til Oseana og dans med bandet Ohms Lov.

Feiring nærmaste laurdag?

Neste år er sankthansaftan på ein søndag, året etter på ein måndag. Men med denne form for fellesarrangement og så god oppslutnad er Os kommune/Oseana no i posisjon til å ta regien også på kva dato det skal feirast.

Kva med å laga feiring i Vikjo fredagen eller laurdagen nærmast 23. juni frå neste år?

VIDEO: Sjå stemninga i Vikjo sankthansaftan. (Foto: Kjetil Vasby Bruarøy)