Varmar opp for Travis
Bone Shakers frå Os deler scene med blant andre Karpe Diem og Travis når dei speler på Trollrock i slutten av juli.
Viss du trudde Rock N LOL-sjef Andreas Lindborg la seg nedpå etter årets rockefestival på Søfteland har du ikkje heilt rett.
Nett no sit han på Flesland for å henta Samsaya, igjen, denne gong for Hundvin Management til VG-lista Topp 20-konserten på Festplassen i kveld.
Så ventar oppdrag rundt Bruce Springsteen-konsertane i Bergen over helga, men det er ikkje berre bak scenen at Lindborg får oppdrag denne sommaren.
– Vi har fått spelejobb på rockefestivalen Trollrock på Beitostølen 27. juli, fortel Andreas, som er trommis i Bone Shakers.
Hjeltnes styrer showet
Arne Hjeltes er konferansier for satsinga på Beitostølen, som blant anna husar band som Travis, BigBang, Karpe Diem, Sivert Høyem, Veronica Maggio og Hellbillies.
Festivalen startar torsdag 26. juli og varer til 29. juli. Bone Shakers skal opna hovudscenen fredag, ein scene Karpe Diem og Travis overtar seinare på kvelden.
Les meir på Trollrock.no
Byr på to nye låtar
Bone Shakers består av osingane Christian Andersen (vokal og bass), Erik Aasen (gitar), Espen Iversen (gitar) og Andreas Lindborg (trommer).
Bandet spelte inn ein EP med fem låtar i fjor. EP-en finn du på nett og på vinyl på Playcom.
Hausten 2011 kom Bone Shakers på 2. plass i musikkonkurransen Emergenza.
– Etter Emergenza var vi i januar på spelejobb i Bø i Telemark. Resten av våren gjekk det i øving og førebuing til Søfteland Rock N LOL.
– Vi driv framleis og prøver oss litt fram, og har nok blitt hardare og seigare. På Trollrock kjem vi til å by på to nye låtar, til hausten har vi plan om å gå i studio igjen, seier Lindborg.
No håper han at osingar og andre rockeinteresserte på noregsferie legg Beitostølen til på reiseruta.
– Eg har fått nokre hint om kjentfolk som kanskje kjem oppom, det hadde vore knallfett med litt medbragt publikum. Dessutan har Trollrock mykje anna spennande å by på for dei som har tid til å bli verande, inviterer Bone Shakers-trommisen.