Vassendgutane på veg

Bildeserie:

1 av 6

Dei kallar musikken sin fest-country, suksesskarane frå Vassenden i Sogn. Men korleis har dei klart å koma frå debutalbum i 2000 til å nærma seg trippel platina (90.000) for fjorårets album "XO"?

- Det har vi lurt på sjølv òg. Det er ikkje enkelt å selja plater i dag, så det har vore overraskande bra respons både på platene og på spelejobbane, der vi har eit snitt på rundt 1000 i salen, seier gitarist og vokalist Rune Ståle Brautaset til Midtsiden.no.

- Det vi har fått høyra er at folk har likt at det har kome noko nytt, med fengjande melodiar og norske tekstar. At det er lett å syngja med, og at tekstane er litt humoristiske har nok også hatt litt å seia, trur Brautaset.

I september 2007 spelte Vassendgutane for rundt 1500 i Nore Neset Aktivitetshus. Fredag 18. september spelar dei i Oshallen.

- På Os er vi på heimebane, det merka vi sist. Det skal bli veldig kjekt å koma tilbake!

Alle mann i permisjon
Det tok av med albummet "Ungkar og dobbeltseng" i 2005, og "XO", som kom ut i fjor, selte raskt til platina og dobbel platina. No er det slik at artistane ikkje har tid til å vera i arbeid utanom bandet.

- I første halvdel av året i år tok dei av oss som ikkje var fulltidsmusikarar, som var dei fleste av oss, permisjon frå jobbane våre. Om nokre av oss jobbar litt utover hausten kan henda, men sommaren har vore travel.

Dei siste vekene har Vassendgutane spelt i Tromsø, Bodø og Senja, på Austevoll og på ein liten stad nær Eivindvik sør for Sognefjorden, kalla Dingja.

- Den konserten kjem eg til å hugsa lenge. Plassen har sikkert ikkje meir enn 30-40 innbyggjarar, likevel samla dei over 800 til konsert, det var så fullt at ikkje alle kom inn, fortel Rune Ståle.

Nytt album neste år?
I den travle konserttida i det siste har ikkje bandet hatt mykje tid til å tenkja på neste album.

- Det kjem ein DVD no i haust, men neste album kjem nok ikkje før tidlegast siste halvdel av 2010.

I Oshallen blir det låtar frå alle fire albuma, truleg låtar som "Silikon i tatti", "Hytta mi", "Hjortejakt" og "Granada".

Billettsal og oppvarming
I fjro prøvde Os Turn Fotball seg som konsertarrangør for første gong. Dance With A Stranger leverte ein kjempekonsert. Men konsertdatoen rett etter sommarferie og skulestart var nok ikkje ideell, så publikumstalet blei for lågt til at arrangementet blei ein suksess.

- I år har vi kome mykje betre i gong. Billettsalet har passert 450, og det blir nok både bra sal fram mot fredagen og ein del i døra, så dette har vi roen på, seier Ove Hjelle.

Det lokale countrybandet Frode Vidars skal saman med Scala varma opp for Vassendgutane. Frode Vidars gav ut album før sommaren, Scala har blant anna juniortrenar Øvind Steffensen som bandmedlem.

Vassendgutane - bandmedlemmar
Lars Egil Vågseter - steelgitar
Ernst Olav Brune - trekkspill
Arthur Johan Bjørdal - vokal & gitar
Sindre Aam - vokal & Bass
Rune Ståle Brautaset - vokal & gitar
Leif Aase - el-gitar & koring
Bjørn Marius Øyehaug - trommer & koring

Album
Pylse og konjakk (2000)
Gi clutch (2002)
Ungkar med Dobbelseng (2005)
XO (2008)

Heimeside: Vassendgutane.no

Under bilda kan du sjå Vassendgutane LIVE med "Hjortejakt".