Vasslekkasje på Lunde barneskule

Fredag formiddag klokka 10.15 blei ein vasslekkasje oppdaga på Lunde barneskule.

– Ein lærar som var innom for å førebu seg på skulestart etter vinterferien oppdaga lekkasjen. Sjølv var eg i ein annan ende av bygningen, seier rektor Elin Skaatun.

Dei tilsette stengte sjølv av vatnet. Os brannvesen var raskt på staden og byrja å lensa skulen for vatn.

400 liter gjennom fleire etasjar

Lekkasjen hadde ikkje noko med sprengkulda å gjera, men viste seg å koma frå eit rør som hadde «hoppa av».

– Røret er på eit loft. Derfrå har vatnet kome ned på sløyden, på toalett og på eit rom der vi underviser i kunst og handverk.

Det har òg kome vatn ned i kjellaren, men dette har gått via ei trapp, ikkje via etasjeskilje.

Brannvesenet har lensa bygget for rundt 400 liter med vatn.

Opnar som normalt måndag

Dei som eventuelt hadde håpa på at skaden kunne gje forlenga ferie, blir skuffa.

– Lekkasjen kom i den gamle delen av skulen, nær overgang til ny del. Ingen klasserom for ordinær undervising er ramma.

– Sånn sett har vi hatt litt hell i uhell, vi kan opna måndag som normalt.

Eksakt kor omfattande skadene er, veit Skaatun førebels ikkje.

– Vi har ikkje hatt takstmann her enno, fortel rektor.