Veidekke fekk OHARA-kontrakt

Prosessen med å bygga nytt hovudavlaupsreinseanlegg for Os (OHARA) går på full fart fram. I førre veke fekk dei fem entreprenørane som hadde levert tilbod på entreprise F1 fjellsprenging svar på kven av dei som får jobben.

Veidekke Entreprenør AS kom best ut med eit kontrollrekna tilbod på 116.328.336,- kroner og har fått tildelt kontrakta.

– No har dei andre en klagefrist, som går ut i løpet av denne veka, fortel prosjektleiar Johannes Håkonsund i Os kommune.

Dei fire andre tilbyderane var:
Flage Maskin AS - 127.953.446,00
STRABAG AB - 120.900.893,78
AS Birkeland Entreprenørforretning - 119.831.596,00
Skanska Norge AS - 117.107.885,00

Alle prisane er eksklusiv mva.

Når kommunen har vurdert tilboda har dei lagt vekt på pris (80%), framdrift (10%) og oppgåveforståing/CV for anleggsleiar/formann (10%).

Tek ut 150-160 000 lastebil-lass

Entreprisen er den største i prosjektet og omfattar all sprening av fjellhallen og tunnelen ned til Kuhnlevika. Totalt er det snakk om omlag 100 000 kubikkmeter fast masse.

– I tillegg til sjølve sprenginga omfattar entreprisen også massetransport og planering. Massene som skal fraktast ut av anlegget tilsvarar omlag 150-160 000 lastebil-lass. Det aller meste kjem vi til å bruka internt på prosjektet i Greidalen og på Moberg. I tillegg håpar vi å få nytta resten til andre kommunale formål slik at transporten blir kortast mogleg, forklarar Håkonsund.

Oppstart i haust

Arbeidet med å byggja hovudavlaupsreinseanlegget tek til allereie i haust.

– Oppstart er planlagt i haust, så vil sprengearbeidet gå føre seg i omlag halvanna år.

– No er det opp til entreprenøren korleis dei vil gjera jobben, men eg vil tru at dei vil drive tunnellen både frå Moberg sida og frå Kuhnlevika. Massene ein tek ut frå Kuhnle-sida vil bli brukt til å planera ut i Greidalen. Sjølve fjellhallen vil naturleg nok bli driven med uttak på Moberg, seier Håkonsund.

Les òg: Vil fylla ut Greidalen

To andre store entrepriser som ein no jobbar vidare med å laga tilbudsgrunnlag for er sjølve reinseprosessen og entreprisen for bygg som omfattar betongarbeider, ledningsanlegg, ventilasjon og anna.