Næringsliv | 15. jan. 2014

– Veldig dårleg stemning

76 frå Os mister jobben når Inwido flyttar Lyssand-produksjonen til Sverige. – Vi fekk oss ein trøkk i trynet i dag, seier Dagfinn Mjånes.

– Veldig dårleg stemning
Egil Lyssand (t.v.) og Dagfinn Mjånes har jobba 42 år og 38 år ved Lyssand Treindustri. (Foto: Kjetil Vasby Bruarøy) 
Kjetil Vasby Bruarøy
Kjetil Vasby Bruarøyonsdag 15. jan. 2014 14:49

På eit allmannamøte på Lyssand Treindustri AS onsdag formiddag fekk dei 93 tilsette beskjed om at eigar Inwido vil flytta produksjonen til Sverige.

Les òg: Vil flagga ut Lyssand-produksjonen

76 av dei 93 tilsette bur i Os, 4 av dei bur i Fusa.

– Mange av dei tilsette er utan utdanning. Seks tilsette er 60 år og har no 26 veker på å finna seg ny jobb med tariffavtale, om dei vil gå av når dei er 62 år, seier hovudtillitsvalt Dagfinn Mjånes (55).

– Eg føler også ekstra med utlendingane som jobbar her, der nokre av dei er ektepar med same arbeidsgjevar, som har kome til Noreg for jobben sin del og etablert seg i Os.

Topptung?

Mjånes seier han gav leiinga ein klar beskjed på allmannamøtet i dag.

– Vi produserer effektivt, men eg meiner vi har fått for tung administrasjon.

– Leiinga har gjort ein svak jobb. Dei burde ha styrka salsapparatet, ikkje tilsett fleire og fleire i administrasjonen.

Fryktar oppseiingar før ferien

Om styret i februar fattar endeleg flytte-avgjerd fryktar Mjånes at dei første tilsette får oppseiingane sine før ferien.

– I år blir det kø på NAV, seier han.

Ordførar Terje Søviknes var blant dei som var med på allmannamøtet i dag.

– Dette er en trist dag for Os, og spesielt for dei tilsette på Lyssand. Bedrifta har ein lang og stolt tradisjon på Os og ein æra ser no ut til snart å vera over.

– Det er også ei stor utfordring for Os når så mange blir arbeidsledige på kort tid. I samarbeid med Inwido mobiliserer vi no NAV for å kunna gje så god service til dei enkelte som mogleg, seier Søviknes.

– Kor myke er godt nok?

– Eg synest det er skremmande at det går denne vegen. Prosessen frå Inwido si side har vore grei, men når vi betaler over 20 millionar kroner i konsernbidrag og likevel får overskot på rundt 10 millionar kroner, så skulle ein tru at arbeidsplassen var trygg.

– Ein kan lura på kor mykje som er godt nok, fortviler Dagfinn.

Han seier nokre av dei tilsette fatta mistanke om framtidig flytting allereie for to år sidan. Då skulle ein fabrikk i Sverige byrja å laga Lyssand-profilar.

Seinare har produksjonen av ei populær Lyssand-skyvedør blirr flagga ut til Polen.

Har redda bedrifta før

Mjånes var 18 år då han i 1976 byrja å jobba ved Lyssand Treindustri. Berre Egil Lyssand (64), fetter til Mons Tore Lyssand som i 2006 selte fabrikken, har vore der lengre.

Egil byrja i fetteren sin fabrikk i 1972.

– Vi har vore med på opp- og nedturar før, jobba med 10 prosent reduksjon i løn i eit heilt år, og som no, jobba 4-dagarsveker for å justera oss etter marknaden, fortel Egil.

– 2013 var eit godt år fram til siste kvartal. Då gjekk det brått nedover, over 26 prosent nedgang. Men vi har klart oss gjennom verre ting før.

10.000 tomme kvadratmeter

Om flytting blir endeleg vedtatt på styremøte i februar er Inwido ute av huseigar Mons Tore Lyssand sitt lokale innan utgangen av 2014.

Midtsiden har ikkje lykkast i å nå Mons Tore for kommentar til at det 10.500 kvadratmeter store lokalet hans truleg står tomt på denne tida neste år.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.