Velta tre og øydelagt ballbinge

Bildeserie:

1 av 2

Vindstyrken er i ferd med å avta og fellesfyrverkeriet i Os hamn skal skytast opp som planlagt.

Men kuling med storm i kasta har sett sine spor nyttårsaftan og første nyttårsdag.

Ferjer har vore innstilte, fleire tusen hus i Os har vore utan straum og ein drosje blei skadd av ei takplate.

Velta tre over vegen i Rødsliane

I 14-tida i dag fekk vi tips og bilde av velta tre over fylkesveg 137 Hegglandsdalsvegen i Rødsliane.

Ei ròten trestamme kviler seg på ein lågspentleidning, men bilar kan passera under.

Har vinden gjort skade der du er? Send tekst og bilde til tips@midtsiden.no

– Vi kjenner til denne, og om ikkje treet allereie er fjerna, så har vi folk på veg, seier kommunikasjonsrådgjevar Jan Kåre Austrheim i BKK Nett.

Trevelten har ikkje ført til straumbrot.

Skadd ballbinge

I Halhjemsmarka er kortsida på ein ballbinge blåst ned.

Dette har skjedd nokre meter frå der det i 1-tida i natt var brann i ein Fretex-konteinar.

Knekt stolpe i Finnebrekka

– Vi har hatt ein roleg dag i dag, med unntak av melding om ein knekt stolpe i Finnebrekka, seier brannsjef Stein Gjøsund.

– Stolpen støtta seg inntil eit gjerde inntil den bles laus og hang i leidningane. Det såg ut som om det var fiber, og ikkje straum i leidningane.