Vender seg vekk frå det vanlege

Vedholmen Galleri, som i år fyller 20 år, opnar laurdag sesongens andre utstilling.

Denne gong er det måleri og grafikk av Dag Thorkildsen som fyller galleriet på Sundøy.

– Som aktiv kunstner i over 45 år, har Thorkildsen ei mengde offentlege innkjøp og utstillingar bak seg, fortel gallerist Vibeke Harild.

Abstrakt og intens

I starten av 1970-tallet var han med i den politiske kunstgruppa «Gras». Han har vore instituttleiar på Institutt for Fellesfag og pro-rektor på Kunsthøgskolen i Bergen. Thorkildsen har med andre ord vore med å utdanna to generasjonar med kunstnarar.

– Thorkildsen sine maleri er abstrakte og koloristiske, med høg intensitet og formidlingslyst. Uttrykket hans er i slektskap med den amerikanske og tyske ekspresjonisme på 1950- og 1960-talet.

– I maleria i denne utstillingen vender han seg vekk fra all konkret avbilding av vanlege gjenstandar og formar, og vektlegg aspekt som farge, lys og komposisjon for å uttrykka ei spesiell kjensle.

Tale, musikk og foredrag

Opningstalen under vernissasjen i morgen er ved tidlegare rektor på Kunsthøgskolen i Bergen, Nils Eger.

Musikk er ved gitarist og komponist Mathias K. Nygård (Finding Neo) og song ved Elias G. Salbu.

Utstillinga står til 15. mars. Søndag 8. mars vil Dag Thorkildsen halda foredrag i galleriet. Dette handlar om betydninga av abstrakt kunst.

Utstillingar hos Vedholmen Galleri i vårhalvåret 2020:
01.02.-23.02. Line S. Hvoslef. Maleri
29.02.-15.03. Dag Thorkildsen. Maleri/trykk
21.03.-19.04. Erling Valtyrson. Mezzotint
25.04.-10.05. Cecilie Galtung Døsvig. Maleri
14.05.-07.06. Signe Marie Andersen. Foto
13.06.-19.07. Oddvar Torsheim: Grafikk.Tegning.Maleri