Vesen på feil veg?
Medan Os kommune ventar på godkjenning frå vegvesenet til å opna Brugata for innkjøring ser vegvesenet sjølv ut til å ha byrja å praktisera dei komande reglane.
I slutten av april bestemte Os kommune seg for å opna Brugata igjen for trafikk begge vegar. Etter innføring av nye parkeringsreglar i Os sentrum blei Brugata einvegskjørt med innkjøring forbode frå Hatvikvegen.
Årsaka er fleire negative tilbakemeldinger på det nye kjøremønsteret.
Men avgjerda er ikkje opp til kommunen å ta åleine. Saka er sendt til vegkontoret hos vegvesenet.
– Vi treng godkjenning frå vegvesenet og politiet, ny skilting må på plass. Men vi har ikkje høyrt frå dei og purra på dei seinast for to veker sidan, seier kommunalsjef Karl Ole Midtbø.
I mellomtida ser det ut som om vegvesenet har "prøvekjørt" dei komande reglane.
– Vi var fleire som reagerte då vi såg vegvesenet koma inn motsett veg i einvegskjørte Brugata tysdag ettermiddag, fortel ein Midtsiden-lesar som sender bilde av syndaren.