Veteran best rundt Huftarøya

Kristi Himmelfartsdag inviterte Os seilforening til den tradisjonsrike "Huftarøy Rundt"-seglasen.

– Det blei ein langdryg seglas med mykje driving utan vind og mykje regn i tillegg, fortel Svein Skoglund i seilforeninga.

Dei 22 båtane som deltok starta ved Strøneosen, i det som var så lite vind at båtane så vidt lea på seg.

– Strøm og små vindpust som kom gjorde at båtane flytta seg sakte over Bjørnefjorden mot Tobbholmane, som skil fjorden før ein legg ut på Selbjørnsfjorden.

– Normalt gjer ein strekninga på omlag ein time, men denne gongen måtte vi bruka tre og ein halv, seier Skoglund.

Ei konsentrasjonsprøve

Blant dei første startane var Huftarøy Rundt-veteran Kåre Perry Sollibakke med sin Comfortina 32 "Godemine". Han var blant dei som takla dei vanskeleg tilhøva best og låg i front.

– I den vekslande og vesle vinden som var låg båtane meir eller mindre samla.

– Nokre fekk fylt ein genaker og spinnaker innimellom og avanserte litt i feltet, men like mykje handla det om å halde konsentrasjonen oppe, forklarar Skoglund.

Dei som klarte det og som skifta seil, jibba og slo etter som vinden kom dro sakte, men sikkert frå dei andre.

Vinden kom tre timar seinare

Ved Tobbholmane møtte endeleg seglasen noko av den vinden som var meldt. Riktig nok tre timar seinare enn rapportane på førehand hadde sagt.

– Dette fekk fart på båtane og det blei kryss fram til runding Kalsundbroa.

– Derfrå kom genaker og spinnaker opp, noko som gav båtane brukbar fart oppover Bekkjarviksundet og ut på Møkstrafjorden.

Spinnaker ein fordel

Skoglund fortel at skipparane valde litt forskjelleg taktikk når vinden endeleg kom.

– Dei som brukte genaker fekk problem med å få den til å stå, så det var nok ein stor fordel å sigle med spinnaker og like riktig å sigle med spidd genoa.

Frå Lindholmen nord ved Hufthamar tilbake til målgang ved Strøneosen valgde skipparane anten å sløre nordom Trolløy før dei kryssa Korsfjorden eller ein rom kryss sør for øya og over Korsfjorden.

– Det viste seg at dei som gjekk sør fekk ein fordel av det, fortel Skoglund.

Siger til Sollibakke

Det viste seg til slutt at veteranen Kåre Perry Solibakke takla forholda best og dro i land klassesigeren i NOR rating t.o.m 0.930 og overallsigeren.

Ha stakk dermed av med pokalen for «Beste båt» og for «Beste klassevinner» kor han slo neste båt i klassa med 22 min og 40 sekund. Nr. 2 i klassen ble «Merelle» (First 31,7 LR) Sigbjørn Paus, nr. 3 ble «Shiraz» (Cumulus) med Gry Hunstad.

Klasse f.o.m 0.931 t.o.m 1.000: Nr. 1, «Synzygus» (Oseanis 331 Clipper) Øyvind Hauge, nr. 2, «Violetta» ( Etap 39S) Trygve Birkelid og nr. 3, «Marlin» (Dehler 34 SV) Hermod Opstvedt.

Klasse f.o.m. 1.001: Nr. 1, «Flyfisk» (First 40,7) Thomas Johannesen, nr. 2 «Tussi» (Bavaria 38 Match) Paul Øyvind Mehammer, nr. 3, «Veni VI» (Hanse 430 E) Jan Hjellestad.

Den største klassen NOR Rating HD: Nr. 1 «X-faktor» (X-332) Harald Matland og Torkjell Tolo, nr. 2, «Tigergutt» (Elan 37) Pål Øyvind Holst og John Elter, nr. 3, «Gleden» (Maxi 1050) Finn Espeseth og Åse Espeseth.