– Vi traff!

WT Litteraturfestival: Nøgde forfattarar, god stemning og godt grunnlag for ny festival. - Det blei utruleg kjekt, seier Frode Sirevåg.

Frode Sirevåg, her under bokbad i Griegsamlinga, er strålande nøgd med årets WT Litteraturfestival (foto: Kjetil Vasby Bruarøy)
Andris Hamretirsdag 13. nov. 2012 14:05

Med galla og utdeling av prisar og konsert med Orbo & The Longshots blei den første WT Litteraturfestival avslutta laurdag kveld.

Sjå kva prisar og kven som vann nedst i artikkelen.

Sjølv om publikumtilstrømninga gjerne kunne vore høgre er arrangørane godt nøgd med gjennomføringa.

- Gjennomsnittstalet på arrangementa blei ok. Det varierte frå full sal til ikkje så full sal, oppsummerar festivaldirektør Frode Sirevåg.

Nøgde forfattarar

Festivalleiinga har hatt fokus på å ikkje bli ein litteraturfestival som mange andre, men i staden å konsentrera seg færre forfattarar og gje dei godt med spelerom og merksemd.

- Det har vore viktig for oss at forfattarane skal få presentera seg og få ei god oppleving.

- TIlbakemeldingane vi har fått er at dei er utruleg nøgde med opplegget, samhaldet blant deltakarane og rammene.

- No håpar eg berre ryktet sprer seg i forfattarkretsane slik at vi kan utvekla festivalen vidare til å bli ein lokal, regional og nasjonal litteraturfestival, seier Sirevåg.

- Ein fryd

Sirevåg skryt uhemma av samarbeidet med Oseana.

- Dei har vore fleksible og skikkeleg ordentlig i alt.

- Alt har vore ryddig, greit og på stell. Det er første gong i mi festivaltid eg har opplevd å vera ferdig med å rydda etter eit arrangement berre 20 minutt etter slut. Tidlegare har vi gjerne stått både to og tre timar, forklarar Sirevåg.

Gler seg til neste år

Sjølv om festivalen ikkje gav økonomisk overskot meiner Sirevåg at økonomien er levbar.

- Ei nystarta bedrift treng nokre år å koma opp og stå. Vi har gode og langsiktige investorar så det er godt jordsmonn til å jobba vidare.

- Eg er utruleg klar for å kome igang med neste års festival allereie, smilar festivaldirektøren.

Kortid festivalen blir i 2013 er ikkje klart enno, men Sirevåg reknar med at det blir i november om Oseana er ledig.

- Ungane var ein draum

Når Sirevåg blir utfordra på å trekka fram det han er særs nøgd med kjem ungane i MusikkGlede og hyllesta til Thorbjørn Egner fort fram.

- Det å ha 100 ungar på scena som eindel av festivalen var heilt fantastisk.

- Då fekk vi verkeleg følelsen av at Osbygda samla seg om festivalen. Det engasjementet Stine Kobbeltvedt og Annveig Myklebust Fjellstad viser fortjener all honnør.

- I tillegg kjem eg til å leva lenge på konsertene med Frode Grytten og Gunnar Staalesen.

- Det var rett og slett ein kjekk kveld kor folk kosa seg og alt fungerte både teknisk og praktisk, avsluttar Sirevåg.

Desse fekk prisar

Oppmuntringsprisen - Den gyldne gulrot: Os Folkebibliotek for at dei gjer så mykje meir enn ein kan forventa seg og at dei strekk seg langt for å fremja lesegleda.

Dagens Jafs: Tor Arve Røssland

Jan Phantas ærespris for fantastisk litteratur: Hans Sande

Årets festivalmor: Bente Bratlund

Årets stemme, for fantastisk framføring av litteratur: Ingrid Berglund

Knut Gribbs ærespris: Gunnar Staalesen

Nøtteklubbens ærespris. Utdelt etter løyve frå nøtteklubben i 2. klasse ved Søre Neset barneskule for framragande formidling av krimlitteratur for barn og unge: Jørn Lier Horst.

Sverdet i stein: Tore Kvæven

Årets vaksne fantasybok: Kristine Tofte

Årets Mulla: Kristian A. Bjørkelo

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.