I dag tidleg reiste Victoria til Lillehammer. No er ho klar for opningsseremoni og 10 dagar med frivillig innsats under OL. (Privat foto)

Victoria på plass i Lillehammer

I kveld opnar Ungdoms-OL 2016. Victoria Hufthammer frå Os er ein av 3000 som jobbar frivillige under leikane.

image
image
image
image
Av: Kjetil Vasby Bruarøy

I kveld opnar Ungdoms-OL på Lillehammer. Fram til 21. februar skal det konkurrerast i 70 medaljeøvingar i 15 vinteridrettar.

Ved sidan av idrettsarrangementa er det 150 kulturarrangement i løpet av dei 10 dagane, alle utanom opningsseremonien er gratis.

Nico & Vinz, Kvelertak, Matoma og Madcon er blant artistane som skal opptre, det er òg Aurora frå Os, som speler på Bruker måndag kveld.

Men Aurora er ikkje den einaste osingen som har ei rolle under OL, Victoria Hufthammer, som fyller 17 år i april, reiste fredag morgon til Lillehammer og er no innlosjert og klar for oppdrag.

– Ei oppleving

– Det var tilfeldig at eg fekk informasjon om arrangementet, og at dei trengte frivillige, men eg bestemte meg fort for å søkja, seier Victoria.

Ho er sjølv aktiv med handball og fotball, og fekk informasjon då ho var på eit aktivitetsleiarkurs som Nore Neset il sendte ho på.

– Kurset var i Bergen i mai i fjor. Det gjekk litt tid før vi fekk svar og eg blei glad då eg fekk plass.

Ofrar ti dagar for OL

Arbeidet er ikkje løna, men dei frivillige får opphald, mat og klede å jobba i. Victoria får skulefråværet ført, men ofrar ei veke på gymnaset for å vera del av leikane på Lillehammer.

– Eg tenkte dette ville bli ei god oppleving, og no gler eg meg til å koma i gang.

Jenta frå Øyane veit ikkje kva oppgåver ho får, men reknar med at det er variert, då ho er i ei innsatsgruppe.

– Arbeidstidene blir cirka 10 til 17. Nokre dagar får vi fri. Eg veit at eg skal på Hafjell den eine dagen, det gler eg meg kanskje mest til, der trur eg det blir mykje action.

22 år sidan sist

I kveld, 22 år og 2 timar etter opninga av leikane i ’94, skal prinsesse Ingrid Alexandra, som hennar far kronprinsen gjorde i 1994, tenna flammen. Skidronning Marit Bjørgen er fakkelbærar.

Også i ’94 var det osingar som jobba frivillig under leikane.

13.000 har sikra seg billett til opningsshowet til Lillehammer 2016. Er du utan billett kan du sjå showet på NRK3 frå klokka 19 eller NRK1 frå klokka 22.25 i kveld. 

Fakta
• Ungdoms-OL blir arrangert frå 12.-21. februar 2016 på Lillehammer, Gjøvik, Øyer, Hamar og i Oslo.
• 12 000 akkrediterte gjestar (av desse er 1100 utøvarar og 3000 frivillige)
• Utøvarane er i alderen 15-18 år, kjem frå 70 nasjonar og skal konkurrera i 70 medaljeøvingar.
• I tillegg til idrettskonkurransane skal utøvarane ta del i eit omfattande kultur- og læringsprogram.
• Alt i regi av Lillehammer 2016, bortsett frå åpningsseremonien, er gratis.
• 200 kulturopplevingar står på programmet, med artistar som Aurora, Nico & Vinz, Kvelertak, Madcon og Matoma.
Sjå òg: lillehammer2016.com

Fleire saker