VIDEO: Overraska elevane med Skam-parodi

Då Os ungdomsskule onsdag skulle ta farvel med årets tiandeklassingar, kom dei med ei overrasking elevane seint vil gløyma.

Med ein Skam-parodi på over eit kvarter fekk dei elevane til å vri seg over kor kleint det var, samtidig lo foreldre og undgom så tårene skvatt.

Sjå videoen i ruta over.

– Dette var ikkje eit pinleg forsøk på å vera morosam, det var ein innertiar, meiner Kjetil Osablod Grønvigh.

Han er far til ein av avgangselevane og tilsett ved kultureininga i Os kommune. Kjetil har ikkje sett NRK-serien før, men hadde stort utbyte av parodien og hyller både lærarane og rektor.

– Snakk om å gje av seg sjølv, snakk om å gje noko tilbake til elevane! Dette har nok ikkje berre vore tidkrevjande, resultatet var fantastisk, og den sjølvironien lærarane viser synest eg er ein fin måte å seia til elevane «eg er glad i deg, eg kjem til å sakna deg».

Gry B. Skarstein fekk alle med på notane

Manus og idé er av lærar Gry B. Skarstein, i rikspressen kjent som vinnar av 71 grader nord 2016.

– Allereie i 8. klasse snakka vi om at vi måtte få til noko spesielt for årgangen når dei var ferdige på ungdomsskulen. Eg kom med forslag om Skam-parodi, ein serie som har vore populær blant elevane våre dei siste åra, og kollegaene mine sa ja.

– Eg trur ikkje alle visste kva dei sa ja til, men alle blei med også etter at dei forsto kva scenar vi skulle spela inn.

På kanten av stolen

Gry skreiv manus der ho prøvde å ta inn høgdepunkt frå dei tre skuleåra og fletta dei inn i klassiske Skam-scenar.

Ho seier dei siste to vekene før avslutningsseremonien har vore hektiske, med filming med hennar eigen mobil rett etter skuletid, men at ho er glad for at resultatet og responsen blei som den blei.

– Vi merka jo at elevane sat på kanten av stolen før kvar ny scene, og folk lo godt etterkvart som dei såg kva lærar som hadde fått kva rolle.

– Vi er litt få mannlege lærarar i denne årgangen, og éin av dei blei sjuk, så enkelte måtte eit godt stykke utanfor komfortsona si for at vi skulle få laga den filmen vi ønska.

Etter oppmoding frå foreldre har ho sjekka med alle kollegaene at publisering av videoen er ok.

Pappa Grønvigh er over seg av begeistring.

– Dette seier mykje om skulen, om leiinga og dei som jobbar der. Du kan koma langt med sjølvironi, også om du skal undervisa, vil eg tru.