Vil dela ut 250.000 kroner til kulturell og sporty «brubygging»

– Bli med å visa fram kva Bjørnafjorden har å by på! er oppfordringa frå fellesnemnda i komande Bjørnafjorden kommune.

Fellesnemnda har sett av kr 250.000 til eit kulturbyggingsprosjekt fram mot 2020.

Frå 4. mars vert det lyst ut ei tilskotsordning der lag og organisasjonar i dei to kommunane kan søkja om pengar til gode tiltak som fremjar samarbeid og kulturell brubygging fram mot Bjørnafjorden kommune.

– Vi vil visa breidda i alt som rører seg innan kunst, kultur, musikk, idrett, natur og anna i den nye kommunen vår, seier kulturjef i Fusa kommune, og komande Bjørnafjorden kommune, Erik Vangsnes i ei pressemelding i dag.

Frivillige lag og organisasjonar kan søkja om midlar til ein eller fleire aktivitetar som må gjennomførast innan 1. januar 2020.

For å få det til myldra mest mogleg vert det ei øvre grense for tilskot på 10.000 kroner.

Aktiviteten må vera:
• Nyskapande. Til dømes ta i bruk nye arenaer og/eller oppsøka nytt publikum.
• Inkluderande. Til dømes utspela seg på «hi sio» av fjorden eller på annan måte inkludera bjørnafjordingar i både Os og Fusa.
• Inviterande. Vi oppmodar til samarbeid og kulturell brubygging.

Du vil finna meir informasjon og søknadsskjema på bjornafjordenkommune.no frå 4. mars. Søknadsfrist vert 20. mars 2019.