Vil du sjå nærmare på denne hagen?

Os Hagelag har dette året som prosjekt å visa fram hagemangfaldet i Os. På neste vandring skal dei til ekteparet Hjørdis og Torolf Juvik på Moberg.

Dette er ein hage som er full av planter og som er blitt forma av eit hagepar som saman har skapt ein hage som er heilstøypt, velforma og som står fram med ei samla form.

– Hagen gir ei stemning av ro og fred sjølv om den ligg sentralt i Os. Kanskje er det inspirasjon frå japansk hagekunst som gir hagen denne stemninga, seier Jan Helge Gram Eggestøl frå Os Hagelag i ei pressemelding.

Her er 200 ulike rododendron-plantene og mange andre artar integrert og klypte til slik at dei glir inn i linjer og strukturar i hagen.

Kunnskap og reise

Hagen er og ei minnebok over eit langt hageliv. Her er det mange ulike planter som har sine forteljingar.

– Å prata med ekteparet om hagen er like mykje ein samtale om botanisk innsikt, hagereiser, hagevener og ulike hageopplevingar. Hagen står fram som ein integrasjon av stor hagekunnskap og eit levd liv.

– Den som besøker denne hagen vil få ei oppleving av dei sjeldne. Dei vil og bli kjent med eit sjarmerande hagepar som har vore aktivt med i ulike lag og foreiningar som har med planter og hage å gjera. Ikkje minst har dei stilt opp for Os Hagelag, Rododendronforeningen og Moldegaard park og hage, for å nemna noko.

Vandringa er førstkomande torsdag frå klokka 18. Juvik bur i Midtskogvegen 30A på Moberg. Det beste er å parkera i sentrum og gå opp til hagen.