F.v.: Jon Espevik, Trygve Berentzen og Patrik Søreide trente i fjella i Os påskeaftan. I mai reiser dei til Nordkapp for å gå til Lindesnes. (Foto: Kjetil Vasby Bruarøy)

Vil gå Noreg på langs

Kva svarer du om kameraten din foreslår å kryssa Hardangervidda til fots? Du kontrar med 3000 kilometer frå Nordkapp til Lindesnes!

Av: Kjetil Vasby Bruarøy

Nei, det er ikkje snakk om eit veddemål. Tanken på å gå Noreg på langs hadde tidlegare vore innom hovudet til Trygve Berentzen då jaktkameraten Jon Espevik i haust foreslo at dei skulle kryssa Hardangervidda.

– «Vi skal ikkje gå Noreg på langs, då», svarte eg. Eg meinte ikkje så mykje med det, men måndagen etterpå så ringte Jon, heilt vill, han hadde fått fri frå jobben, fortel Trygve og ler.

Dei to osingane ringte til Patrik Søreide, ein vossing busett i Bergen. Søreide hadde for 2,5 år sidan kome med forslag om det same til Trygve, då dei to var kollegaer i eigedomsmeklarbransjen, og måtte nesten få sjanse til å vera med.

– Då eg ringte var det 20 minutt sidan Patrik var ferdig med jobben han hadde i samband med ungdoms-OL, så han sa ja på strak arm.

Frå mai til september

Det er ifølgje norgepaalangs.info rundt 320 personar som har fullført Noreg på langs etter den kjente stafetten i 1951. Turen er på rundt 3000 kilometer, der dei raskaste gjennomfører på 60-70 dagar, mens mange nyter turen og bruker rundt fire månadar.

– No gjeld det å fortelja dette til flest mogleg sånn at terskelen for å trekka seg blir svært høg.

– Turen skal starta med avreise til Nordkapp 21. mai og vi har planar om å bruka rundt fire månadar.

Vil kombinera turen med jakt

Årsaka til at dei tre går frå nord til sør er ikkje den psykologiske fordelen med «nedoverbakke» på kartet.

Jon og Trygve er ivrige storviltjegerar og ønskjer å få turen til å klaffa med reinsdyrjakt på Hardangervidda.

– Vi har søkt om løyve og håper vi er heldige med trekninga.

– Men de skal ikkje gå i fire månadar med våpen på ryggen?

– Nei! Vi må i så fall få våpen køyrd opp til oss når vi kjem til jaktterrenget.

Ingen ferjer - lite asfalt

Dei tre eventyrarane kjem ikkje til å koma innom Os på turen, heile marsjen skal gjennomførast utan ferjer.

– Vi må nok gjennom ein undersjøisk tunnel, det er einaste snarveg. Vi vil òg prøva å halda oss mest mogleg i terrenget, men enkelte stadar blir det nokre kilometer på asfalt.

Gutane er i gang med trening og har gått i ukjent terrreng på Stord og på asfalt på Tysnes.

– Kva er det verste som kan skje på turen?

– Dei mest realistiske farene er skader i beina, betennelse og liknande. Vi har vore innom hos manuellterapeutane Tore og Randi Toft i Varåsen, dei har hjelpt oss med øvingar, uttøyingmetodar og forklart korleis vi skal teipa opp eventuelle skadar.

– Om éin blir skadd og ikkje kan halda fram, vil dei to andre fullføra turen?

– Ja, det vil eg tru, det er jo ein fordel ved å vera tre. Men vi håper naturlegvis at alle kjem seg uskadd frå nord til sør.

– Noko må jo gjennomførast

På spørsmål om kva som fekk Espevik til å hoppa i det og be om fri frå tømrarjobben, svarer han:

– Vi har hatt så mange rare idear opp gjennom åra, noko må jo gjennomførast.

Berentzen synest sjølv at dette kom brått på, men at eitt argument vog tyngst.

– «Det er no eller aldri», sa Jon. Det krev litt å ta fri frå jobb, førebu seg på tur og å gjennomføra, men ingen av oss born og alle liker seg i naturen. Vi må gjennomføra dette mens vi kan.

Dei tre turkameratane skal ha på seg tracking, laga blogg og få seg heimeside. Jon Øyvind Tøsdal skal hjelpa til med det tekniske.

– I tillegg skal vi sjå om vi kan få oss nokre sponsorar. Både ryggsekk og mesteparten av innhaldet må skiftast ut, vi treng så lett utstyr som mogleg, frå telt til sovepose.

Dei tre deltakarane

Trygve Berentzen
Alder: 31 år
Sivilstatus: Sambuar
Yrke: Eigedomsmeklar
Idrettsbakgrunn: Mosjonist og jeger

Jon Espevik
Alder: 27 år
Sivilstatus: Singel
Yrke: Tømrar/byggmeister
Idrettsbakgrunn: Mosjonist og jeger

Patrik Søreide
Alder: 40 år
Sivilstatus: Sambuar
Yrke: Tidlegare eigedomsmeklar, ledig etter engasjementet i ungdoms-OL.
Idrettsbakgrunn: Var i verdstoppen på ski, men ikkje langrenn. Har blant anna bronse frå verdscupen i kulekøyring/freestyle. La opp i 2003.

Fleire saker