midtsiden

Vil ha kongen med på jakt

I går blei Jimmy Bjarne Øvredal tildelt Kongens fortenstmedalje i sølv. No gler han seg til å besøka slottet.

Av: Kjetil Vasby Bruarøy

- Det var uventa og ufortent. Det som var mest imponerande var at familien har klart å halda det hemmeleg for meg, seier Jimmy Øvredal.

Under ein konsert og foredragskveld om natur og villmark i Solbakkestova blei han i går tildelt Kongens fortensmedalje i sølv. Mette og Sverre Samdal sto for arrangementet, ordførar Terje Søviknes for sjølve overrekkinga.

Ein royalist
Kongens fortenstmedalje blei stifta av Kong Haakon VII 1. februar 1908. Medaljen har portrettet av den regjerande kongen med namn og valspråk på framsida, medan den på baksida har ein krans med omskrifta "Kongens fortjenstmedalje". Innanfor kransen er namnet på mottakaren inngravert.

- Korleis er ditt forhold til kongehuset og kongefamilien?

- Eg er ein svoren royalist, fortel Jimmy, som har bilde av både Haakon, Olav og Harald på hytta.

- Du har i mange år snakka om å invitera kongen med på hjortejakt. Er det noko sjanse for at Harald kjem på besøk?

- For det første har han mange andre å jakta med, for det andre har eg sjølv pensjonert meg som hjortejeger. Men no når eg har fått medalje blir eg jo invitert bort på slottet, og medan eg er der så kjem eg nok til å invitera han til ein tur i Øvredalen og på Svinningen.

I ny «jobb»
Medaljen blir delt ut "til lønn for fortenster av kunst, vitskap og næringsliv, og for framifrå forhold i offentleg teneste".

«Søknad om tildeling bør sendast i nær tilknyting til avslutninga på den verksemda som skal lønnast», står det på kongehuset.no.

- Eg har ikkje avslutta, eg har nett begynt, seier Jimmy, som pensjonerte seg for fleire år sidan.

- Eg slutta som lærar og byrja med løna arbeid, spøker han om pensjonisttilværet.

- Har vore så mykje
Det er ikkje berre den lange lærarkarriera Sverre Samdal argumenterte med då han i sommar sendte søknaden.

- Jimmy har vore involvert i, og vore med på å starta, mykje forskjellig, som Hegglandsdalen idrettslag, samlingslista og Os småfiskarlag. Han har merkt fuglar i 50 år, vore ein viktig del av durspelsamskipnaden og gjeve ut ei lang rekkje diktsamlingar, ramsar Samdal opp.

- Jimmy betyr så mykje for så mange osingar og andre at det blei ein fyldig søknad.

Diesel og bensin
Sverre blei så glad då svaret og medaljen frå kongehuset kom at han reiste rett ned og fylte bensin på ein ny dieselbil.

- Det var stort å få positivt svar, vanskeleg å halda det hemmeleg og flott å endeleg få unna tildelinga i ein fin seremoni i Solbakkestova.

Rundt 80 gjestar fekk med seg konserten med durspelsamskipnaden, lesestunda med Jimmy og lysbildeframvising av Svein Håland frå Ut i Naturen i går.

- Vi prøvde å lura han og han blei lurt, seier Samdal nøgd.

Fleire saker