Vil løfta nivået på norsk interiør
Laurdag opnar butikken La Casa Exclusive i Os sentrum.
Bildeserie:
Donatas Bilius har bygd mange hus i Os og laftehytter i den norske fjellheimen etter at han for sju år sidan flytta frå Litauen til Noreg. Han har både jobba for andre byggefirma og med eige foretak.
No supplerer han tømrarfirmaet sitt med butikk i Sentrumskvartalet, del av lokalet som S Tvedt sin jernvare heldt til i, ut mot drosjebua og parkeringsplassen ved rådhuset.
– Eg synest nordmenn vel mykje spennande arkitektur på husa sine, men innvendig er det meste veldig likt. Fleire av husa eg har vore med og bygd, har hatt litt skuffande interiør, synest han.
– Med unntak av fint golv, kjøkken og bad, er gjerne veggar, vindauge, dører og listverk det enklaste du får tak i.
Oppussing og nybygg
Dekorative lister og heile designveggar laga i økologisk gips, dører i heiltre - eller plast, ekstra lydisolerande, eller med stor høgde og valfritt bilde som dørflate, er i utvalet.
– Eg slo frå meg å satsa på varer i låg prisklasse. Som tømrar har eg hatt kundetilfredshet som første prioritering, eg gir meg aldri før kunden er nøgd. Sånn skal det bli her óg. Dette blir ein butikk for dei som vil ha noko ekstra, anten det er andre tømrarar, arkitektar eller privatpersonar som pusser opp.
Ved sidan av byggevarer vil La Casa Exclusive levera heile hus og heile laftehytter.
– Eg har vore med å bygga mange laftehytter i Noreg, med norsk metode og tømmer frå Sibir. Vi har dessutan forhandlarstatus på hus bygd i modular, for effektiv byggeprosess og hyggeleg pris.
Vil visa kvalitet og variasjon
Donatas held fram med byggefirmaet sitt og får hjelp av sambuar Beatris Krumova til å halda butikken open. Beatris, som kjem frå Bulgaria, gjekk design og handverk før ho blei frisør, og er innstilt på lange dagar med butikkdrift på dagtid og hårklipp ettermiddag og kveld.
– Det krev ekstra innsats når du skal driva for deg sjølv. Interiør og design interesserer meg, og eg gler meg til å hjelpa til i butikken.
– Folk kan finna det meste på internett sjølv, men det er ikkje like enkelt å kjenna kvaliteten på nett eller i ein brosjyre, derfor har vi bygd opp utstilling med delar av utvalet. Med klede er det enklare, du kan senda det som ikkje passar i retur. Dei som bygger hus, eller vil pussa opp, ser gjerne ikkje for seg å senda ei dør eller ein heil gipsvegg tilbake.
Paret har fått avtalar med ulike fabrikkar i Litauen.
– Dei som skal bygga heile hytter eller hus, vil gjerne ha ein enkel, men trygg prosess. Fabrikken i Litauen er til å få bakoversveis av, og kundar i denne klassen ønskjer vi å ta med på fabrikkbesøk, både så dei kan bli kjent med prosessen og leverandøren, og så dei kan føla seg trygg på garantiane som blir gitt.
Spennande? Vil du ha ukas høgdepunkt i innboksen?
Les meir om
Last ned Midtsiden-appen idag
No kan du følgja nyhende frå Os - rett i appen.
- Gratis å lasta ned
- Bli varsla straks noko skjer
- Tilgjengeleg i App Store og Google Play Store
For å få tilgang til alle sakene i appen må du vera abonnent.