Vil sikra jorda

Då plan- og bygingsutvalet handsama forslaget om å legga områdereguleringa for Hatvikvegen ut til offentleg ettersyn var det eit samstemt utval som gjekk inn for dette.

– Eg har ingenting imot denne, men har eit spørsmål om beitemarka som blir omdisponert.

– Om eg skjønar det rett så vil denne bli eigd av vegvesenet, kan vi sikra denne til bøndene, undra Torill Keys (Ap).

Prisen kan auke

Svaret fekk ho frå Gustav Bahus (Frp), som òg sit i samferdselsutvalet i fylket.

– Statens vegvesen tek alltid rikeleg med grunnerverv også utanfor der dei skal byggje, slik at dei mellomanna får plass til utstyret.

– Så kan det som er til overs bli tilbakeførd til dei opprinnelege grunneigarane etter at prosjektet er fullført.

– Men, vil det vera til same pris, eller auker dei den, undra Keys.

– Det kan skje. Andre stader har det skjedd at andre enn grunneigarane har kome inn og kjøpt marka, forklarte Bahus.

Ikkje føringar, men ønskjer

Forholdet mellom dei opprinnelege grunneigarane og vegvesenet vil vera eit privatrettsleg tilhøve.

– Det kan jo bli Davids kamp mot Goliat. Er det ikkje noko vi kan gjera for å sikre bøndene, følgde Keys opp.

– De kan ikkje leggja føringar for dette, men det er ingenting i vegen for at de, som utval, kjem med ei setning om korleis de ønskjer dette, svara assisterande rådmann, Paul Manger.

Eit samrøystes utval la difor til ei setning om at utvalet ønskjer at all produktiv matjord blir tilbakeført til opprinneleg hjemmelshavar frå Statens vegvesen ved anleggsslutt.