Kommunen har gått fleire rundar med hotellinvestorar og hotelldrivarar for å få desse til å kjøpe tomta bak dei fire blokkene til Os Sjøfront, men tidsfristen sjøfronten sette for ei avgjerd gjorde at kommunen valde å legga dialogane med investorar og drivarar på is, og i staden forhandla framei kjøpsavtale direkte med Os sjøfront.
For 25,3 millionar kjøper kommunen tomta. I tillegg betaler dei 2.040.000 for å overta Os Sjøfront AS sine aksjar i Os Parkering AS.
- Det er ein økonomisk risiko å ta. Førebels er det ingen av hotellutbyggarane som har våga å gå på det.
- Vi må strekka det mykje med å auka talet leilegheiter om vi ikkje får til eit hotell, påpeika Jostein Neverdal (KrF).
- Ingen vil ligga med oss
Kommunestyrerepresentantane var samde i at hotellprosjektet truleg vil få ein positiv verknad på drifta av Oseana og for Os sentrum.
- Eg og mange med meg meiner at det er opplagt interresant med hoteller i sentrum.
- Ole Paus besøkte nettopp Oseana. Eg veit ikkje om han song "Hvorfor ligger ingen med meg?", men det får meg til å undra over kvifor vi ikkje får nokon av dei som har greie på det til å hoppa til køys med oss.
- Eg føler eg er i ferd med å gå ut i spagaten. Det er ikkje veldig enkelt. Eg må nok til slutt stemma på intuisjon, sa Lars Atle Skorpen (Ap).
E-39 er nøkkelen
Ordførar Terje Søviknes (Frp) meinte det framleis er interesse for å etablera hotell på tomta frå aktørane, men at nøkkelen til ei realisering ligg i E-39 mellom Svegatjørn og Rådalen.
- Dei er framleis interessert i prosjektet. Spesielt drivarane i Bergen Hotel Group har poengtert at E-39 er nøkkelen til hotellprosjektet.
- Dei har tru på fritids- og konferansemarknaden, men er meir usikre på business-segmentet.
- Der er det ny veg og utviklinga av Lyseparken som er nøkkelen, i dag er det nok ikkje eit stort og tungt nok næringsliv i Os til å dekkja det behovet eit hotell vil ha for forretningsgjestar, analyserte Søviknes.
- Eg trur tida jobbar for oss.
- Får vi fastlagt ein tidsplan for E-39, så trur eg ein kan få realisert hotell og gje naudsynt tryggleik for ein hotelleigar og -drivar.
Kan tapa penger
Jon Sivert Rykkel (V) var ein av dei mange som var usikker på om han skulle stemma for eller mot kjøp av tomta.
- Eg har sjeldan måtta gå så mange runder meg med sjølv som i denne saka.
- Det er veldig mykje pengar, og då tenkjer eg på driftkostnadane med å betjena eit lån av denne storleiken. Dei pengane kunne vi nytta til stillingar både i skule, helse- og omsorg og andre ting.
- Det er desse prioriteringane vi politikarane må gjera, i tillegg til å vurdera om vi er villige til å ta risikoen på å eventuelt tapa pengar.
Rådmann Knut Terje Rekve delte òg uroa over den manglande tryggleiken politikarane hadde.
- Oppsummert deler eg det mange har sagt.
- Det er ikkje eit opplagt fasitsvar. Det er usikkert og vi kan risikera å tapa penger.
- Eg detter ned på at sjansen er her og no, og har konkludert i saksutgreiinga at den risikoen kan kommunen ta, sa rådmannen.
Fleirtalet på 22 røyster, beståande av H/Frp og 3 frå Ap, gjekk for å gå for kjøpet.