– Vi hadde ikkje signert med Vilde om vi ikkje hadde tru på at ho skal spela i Toppserien komande sesong, seier Patrik Hansson. (Foto: Sandviken il)
– Vi hadde ikkje signert med Vilde om vi ikkje hadde tru på at ho skal spela i Toppserien komande sesong, seier Patrik Hansson. (Foto: Sandviken il)

Vilde er klar for Toppserien

Vilde Drange Veglo (17) signerte med Sandviken i går.

Kjetil Vasby Bruarøy
05. desember 2019 - 13:57

Os-spelar Vilde Drange Veglo signerte onsdag kveld kontrakt med Toppserie-klubben Sandviken.

Vilde har vore sentral på Nore Neset/Os sitt damelag, og har i tillegg spelt med Os G19, seinast i finalen i Lagunen Fotballfestival som lagkamerat med kjærasten Harry Moore.

– Eg har hospitert med Sandviken ei stund, som del av Toppfotballsamarbeid Vest, og liker meg godt i klubben, seier Vilde.

Sjølv om ho har trvst godt både med damelaget til Os/Nore Neset og med gutane, føler ho tida er moden for å prøva seg opp nokre nivå i damefotball.

– Sandviken satsar. Dei har både sendt gode spelarar til utlandet og henta nye, det blir veldig spennande å kjempa om plass på eit lag som dette.

Sandviken landa på 4. plass på øvste nivå i norsk toppfotball i årets sesong, 6 poeng bak Vålerenga på 2. plass og 10 poeng bak serievinnar LSK. Nyleg blei Sandviken kåra til årets klubb i Toppserien.

Del av ungt trekløver

Hovudtrenar Patrik Hansson er nøgd med å få Vilde i stallen.

– Vilde har fleire gode kvalitetar. Ikkje minst har ho ein veldig gjennombrotsstyrke, seier Patrik til Midtsiden.

– Saman med våre to andre unge talent, Ida frå Stord og Mathilde frå Sotra, vil ho utgjera eit spennande trekløver. Målet er heilt klart at desse skal spela Toppserie-fotball komande sesong, elles hadde vi ikkje signert dei, men det viktigaste er at dei opplever positiv utvikling og at dei får ein overkomeleg treningskvardag.

Hansson er merksam på både reiseveg og risiko for skade på dei unge spelarane.

– Vi vil i dialog med klubbane dei kjem frå, for å forma ein best mogleg timeplan for desse jentene.

Vilde har signert 1,5 år amatørkontrakt med Sandviken, då ho ikkje veit kvar vegen går etter fullført gymnas sommaren 2021.

– Vi i Os Fotball er veldig glade på Vilde sine vegne. At ho får sjansen hos Sandviken synest eg er fortent, og timinga for overgangen er god, seier dagleg leiar i Os Fotball, Endre Brenne til Sandviken IL si heimeside.

 

Les meir om

Fotball Os dame