Vilde knekte begge armane
– Pinleg for kommunen, som tar ferie i sju veker i staden for å halda løftet sitt og gjera ferdig vegen ved Nore Neset skule, meiner pappaen.
Fredag ettermiddag ramla Vilde Hagen Røttingen på sykkelen sin og knekte begge armane.
– Eg sykla frå fotballbanen og ned forbi skulen. Eg var ekstra varsam der det har vore vegarbeid, likevel var det akkurat som om alt var laust, hjulet berre snudde seg på tvers og eg flaksa over styret, fortel Vilde.
– Etterpå hadde eg så vondt i armane og nevane at det var så vidt eg klarte å trykka på mobilen min så eg fekk ringt til mamma.
Hos legevakten blei det påvist brot i begge beina i den eine armen og i det tjukkaste beinet i den andre. Resten av dei første skuledagane blir for sjuandeklassingen med gips på begge armar.
– Kritikkverdig
Vegarbeidet forbi Nore Neset skule og inn til tomta der den nye ungdomsskulen skal byggast har halde på ei stund og skulle vore ferdig til ferien.
– Vi får håpa at dei kommunetilsette hadde det kjekt i Dyreparken, for dette er resultatet av å ikkje ta ansvar, meiner Petter Spjell Røttingen.
Les òg: Skulestart etter stillstand
Han siktar til Tor Inge Døsen sin kommentar til tidlegare kritikk av stillstand på byggeplassen i sommar. Døsen meinte det ikkje berre var lærarane som ville i Dyreparken, altså ha ferie.
– Dei kan ta både ferie og avspasering, men i 6-7 veker? I staden for å bruka litt av sommaren på å gjera ferdig det som dei hadde lovd å gjera ferdig før ferien, så set dei berre maskinene frå seg. Eg synes det er kritikkverdig og pinleg for Os kommune.
Fleire ramla
På spørsmål om Vilde var varsam nok på grusen fortel pappa Petter at forholda nyleg hadde blitt verre.
– Rett etter skulestart la dei ny pukk på vegen. Og så let dei den ligga heile helga før dei pakka den samen med trommel, så alt var laust.
– Eg har sykla på grus før, det var derfor eg var varsam. Men denne var heilt annleis, eg veit om fleire som har ramla på den, til og med folk som har gått til fots, fortel Vilde.
Krangla om hjelm
Før ho reiste heimefrå hadde ho ein krangel med faren. Ho ville nemleg ikkje bruka hjelm fordi den øydela hestehalen.
– Heldigvis sette eg foten ned. Ho fekk sykkelen i hovudet etter at ho landa, så hjelmen fekk ho bruk for, og dette var det første dei spørte om på legevakten, både i Os og i Bergen, seier Røttingen.