Vill priskrig på julemat

– Det var ein gong ein julegris, seier Ingunn Aadland Hope og ler mens ho fortvilt ristar på hovudet.

Hyllene er tømt for alt frå 1,5 liter med julebrus til enkelte typar marsipan. Julesylte har ho éi eske igjen av i Rema 1000 Idrettsvegen.

Torsdag kveld fekk Midtsiden tips om priskrig og i hyllene hos Kiwi og Rema 1000 finn vi prisar som 1 kroner for surkål, 1 kroner for 250 gram bacon til lutefisk, 3 kroner for gløgg, 1 kroner for 500 gram marsipan og 3,50 kroner for 1,5 liter med julebrus.

Kundane blir overraska

Priskrig inn mot høgtidene er vanleg, men årets jul ser ut til å bli ekstrem.

– Det skjer fort og prisen kan bli sett ned fleire gongar på ein dag, seier Trond Hope på Rema Kuvenstasjon.

– Ofte veit vi det ikkje i kassen før vi slår det inn. Kundane blir overraska, men ser ut til å spre det på facebook, for enkelte kjem inn tre-fire stykker i lag og fyller handlevognene, seier kona Ingunn.

Målretta handel hos Kiwi

Hos Kiwi Gudriflaten møtte vi Edit Opstvedt med full handlevogn.

– Eg fekk tips av ei venninne mens eg var på trening. Med desse prisane er det berre til å fylla vogna, eg handlar så eg kan gje til andre òg.

Edit hadde tatt med seg alt frå gløgg til julebrus og var på veg for å sjå etter bacon då ho fekk høyra om prisen. I kassen fortel Marie Haringstad at enkelte har handla heile kartongar med raudkål og surkål.

– Det er tydelegvis mange som har fått med seg dei ekstremt låge prisane, seier ho.

«Spionerer» på prisane til kvarandre

Regionssjef hos Kiwi, Jan Olav Mjøs, seier som Trond Hope at kjeden har prisjegerar for å sjekka nivået hos konkurrentane.

– I fjor haust gjekk vi ut og sa at Kiwi skal bli billigast. Det er noko vi jobbar for kvar dag. Det er ein veldig tøff marknad og i dag gjekk prisane på ein del varer kraftig ned.

Hope la merke til at Kiwi gjekk ned i pris i dag, men seier krigen har vart nokre dagar og at Coop Extra har køyrd hardt på.

Kan gå tom før jul

– Kor lenge kan prisane vera så låge?

– Det kan vera snakk om ein dag og det kan vera snakk om ei veke, seier Trond Hope.

– Det er umogleg å seia. Men vi gir oss ikkje, seier Mjøs.

Begge dei to butikkane er tomme for nokre av varene.

– Vi har bestilt meir, men det er vanskeleg å seia kva du får tak i når nivået er som dette. Enkelte julevarer, som julesnop og marsipan, blei bestilt i sommar og desse varene er det neppe råd å få tak i meir av, seier Ingunn Hope.