Tek deg til topps - Thor Arne Solberg står bak det nystarta Mountain Adventure. (Foto: Kjetil Osablod Grønvigh)

Viser veg til nye toppar

Thor Arne Solberg vil gjera levebrød av ta folk med på tur. No har han starta Mountain Adventure.

image
image
image
image
Av: Kjetil Osablod Grønvigh

– Mellom klokka sju og tre er eg på jobb. Etter det er eg på tur i naturen.

Thor Arne kjem frå Evje på Sørlandet, men har allereie mange år bak seg i Os.

– Eg jobbar med spesialavfall hos Bir, i tillegg er eg sensor hos Hordaland fylkeskommune for dei som skal ta fagbrev innan handtering av spesialavfall.

På fritida held han på å bygga opp ei ny verksemd i ein heilt annan kategori.

Naturen på blå resept

Ei skilsmisse for nokre år tilbake gjorde at Thor Arne tok steget ut i naturen.

– Eg venta til eg blei 42 år før seg starta å nytta naturen aktivt. Etter skilsmissa enda eg opp med å ha det å vera i fjellet som terapi. Eg berre gjekk og gjekk. Slik eg ser det burde naturopplevinger koma på blå resept. Det er utruleg kva litt puls og flott utsikt kan gjera med kropp og sinn.

Thor Arne fortel at han byrja med Liafjellet, men etterkvart byrja han å «samla» på toppar.

– Då eg utvida turområdet, såg eg at eg likte å dokumentara dei ulike toppane. Etterkvart som formen tok seg opp, utvida Thor Arne repetoaret til å inkludera løpeturar i fjellet.

Tryggleik og kvalitet

Eit genuint ønskje om å tilretteleggja for trygge turar ligg bak Thor Arne sitt nystarta «Mountain Adventure».

– No har eg gått for draumen, bokstaveleg talt. Eg har brukt godt med tid og energi på etableringa av firmaet mitt. Skulle eg først gjera dette, var det naudsynt for meg å stå fram som ein seriøs aktør i marknaden.

I tillegg til å etablera firmaet har Thor Arne teke naudsynte kurs i regi av DNT. Fleire år som brann- og redningsarbeidar har dessutan gjeve brei og relevant erfaring.

Fjellførar

Thor Arne og Mountain Adventure tilbyr enkeltpersonar og små grupper unike og trygge oppplevingar i det som kan vera krevjande fjellterreng.

– Tryggleiken kjem alltid først - fjellet kan vera nådelaust med deg, og det hjelper lite kva vêrmeldinga fortalde deg når det heile snur brått på toppen.

Thor Arne fortel om ei fersk oppleving der han guida ei dame frå Bergen opp til Søre Gullfjellstopp;

– Toppen ligg på 987 meter over havet, og kunden kjende seg i utgangspunktet ikkje trygg på å ta turen åleine. Turen starta med fint vêr og gode forhold. Vel oppe åt vi lunsj, og kunden opplevde vel at turen ikkje var så krevjande som ho først hadde trudd.

– Det heile endra seg brått då tåka kom sigande og dekka inn heile fjellet. Temperaturen gjekk ned, og brått befann vi oss i, for henne, ukjend terreng. Då eg tok fram kompasset og fekk oss ned att på ein trygg måte forsto ho kvifor det var verdt å ha med ein fjellførar.

Sesong til snøen kjem

I dag tilbyr Thor Arne turar til Kvinherad - Bjørndalstraversen, Gygrastolen, og til Jotunheimen/ Hurrungane, men han jobbar med å få til turar til Store Skagestølstind. I tillegg kan du få deg ein trygg tur til meir lokale fjell som Gjønakvitingen i Fusa og Svinningen i Os. «Klassikarar» som Trolltunga er òg å finna i katalogen til Thor Arne.
Naudsynt utstyr til dei ulike turane kan han òg hjelpa deg med.

– Sesongen min frå snøen forsvinn til den kjem tilbake, men eg vil gjerne utvida med breturar og vinterturar etterkvart. Folgefonna ligg jo ikkje langt unna!

Til no har Thor Arne i stor grad nytta seg av sosiale media til å markedsføra firmaet, og dette ser ut til å ha virka godt.

– Sjølv det er andre aktørar i denne marknaden, har eg har allereie venteliste på fleire av turane. Eg har fått gode tilbakemeldingar frå dei kundane eg allereie har hatt, og «word of mouth» er godt som gull i denne bransjen. At eg leiar turane med sørlandsdialekt og eit roleg sinn hjelper kanskje, seier Thor Arne og ler godt.

– Er Møsnuken kort nok?

Med åra har Thor Arne blitt ein aktiv friklatrar, men på spørsmål om å anbefala ein kjapp ettermiddagstur på eit av fjella i Os, slit han litt;

– Er Møsnuken kort nok?

– Eg elskar lange, tunge motbakkkar - dess lengre turen er, dess betre er den. Men Møsnuken er ei flott oppleving, og tar du turen over Osvidda, frå Svinningen og over Søtefjellet, då har du ei flott, lokal oppleving!

– Er målet å enda med å ha Mountain Adventure som heiltidsjobb?

– Eg tek det heile med små steg, men ja, dette er vegen eg har lyst å gå, seier Thor Arne før han småspring av garde for å møta nokon han skal på fjelltur i Fusa med. 

Fleire saker