Voldtekt var løgn

Ei kvinne som er i slutten av 20-åra hevda at ho blei voldtatt av ein namngjeven mann på eit nachspiel hausten 2009.

Nokre dagar seinare blei mannen tatt av politiet og plassert i fengsel i halvanna døgn.

Voldtektssaka blei sommaren 2010 henlagt grunna "bevisets stilling". I mellomtida hadde den då voldteksmistenkte mannen meldt kvinna for falsk anklage. Også denne blei seinare henlagt grunna bevisets stilling.

Innrømte løgn

Sommaren 2011 møttes dei to tilfeldig på ein utestad og kvinna innrømte framfor fleire andre at ho hadde forklart seg falsk.

Seinare same sommar forklarte begge seg på nytt for politiet og kvinna innrømte forholdet.

Kvinna har forklart at dei to hadde frivillig sex på nachspielet, men at ho frykta den dåverande sambuaren sin reaksjon om han fekk veta at dei hadde hatt frivillig sex.

Hordaland politidistrikt sikta i desember kvinna for brot på straffelova § 168 første straffalternativ for "ved falsk anklage....å ha søkt å pådra ein annan siktelse eller fellelse for eit lovbrot".

Må sona ein månad

Då saka blei behandla i Nordhordaland tingrett denne veka tilsto kvinna.

Påtalemakta foreslo ei straff på fengsel i sju månader, der 90 dagar blei gjort betinga med vanleg prøvetid.

Forsvararen bad om samfunnstraff.

Retten kom fram til at passande straff var seks månader i fengsel, med fem av desse på vilkår med prøveti på to år.

I tillegg blei kvinna dømt til å betala 116 256 kroner i erstatning til mannen ho meldte.