We feel good!

Bildeserie:

1 av 6

Å skulle intervjua eit orkester på 15 personar, er litt som å tetta ein morken hageslange med plaster. Korkje pennen eller handa klarar i skriva ned alle gullkorna, anekdotane og dei tallause vitsane som tyt ut.

At The Untouchabl(u)es har hatt mykje å seia for bygda og for kulturlivet i Os, er det inga tvil om; ni utselde vetle nyttårsafta-show i Fjellheim seier sitt!

Då det var slutt i 2006, skulle det gå 12 år før gjengen vart samla att.

Første jobben etter pausen var under Torgfesten tidlegare i år.

Det skulle eigentleg bli med det.

Sjå video frå konserten til The Untouchabl(u)es.

Det handlar ikkje om pengane - kva for pengar!?

– Kva er det som får 15 vaksne menneske til å halda fram med noko så økonomisk usikkert som musikk - det skal jo delast på 15 (!). For ikkje å snakka om logistikken rundt det å synkronisera 15 ulike liv slik at alle møter opp på same stad til same tid?

– Rein idealisme, kjem det frå Geir-Magne Moberg.

– Kva pengar, kjem det raskt frå Bente Strønen. Eg har aldri sett noko pengar i dette bandet.

Dette løyser ut ein lang diskusjon om bandet nokon gong har vore ei kjelde til inntekt, kva utstyr bandet i si tid investerte i, og kva du no må betala på finn.no for ei av platene dei i si tid gav ut.

– 70 kroner sist eg sjekka, rop Moberg. Skuffande lågt, om eg skal få seia det sjølv.

Når artikkelforfattaren spør kor mange cdar som enno ikkje er selt, må det verkeleg tenkast høgt. Etter mykje att og fram, vert talet fire til fem eksemplar fasiten.

– Med andre ord, godt utseld, seier Moberg.

Dei tøffaste først

Når det gjeld sundagens spelejobb på Nore Neset - Untouchabl(u)es tek det ein i musikkbransjen kallar «gravferdsskiftet» og varmar publikum for hovudartisten - er det ikkje tvil om at gjengen ser fram til oppdraget.

– Vi har spelt med Vetrhus før, fortel Moberg, men er innrømmer lett at eg måtte googla Gunslingers litt.

– No håpar vi berre at folk kjem tidleg nok. Ta heller vorspielet saman med oss. Vi går på klokka 20.00, så her må ikkje folk rota med klokka og koma for seint.

På ny sporar intervjuet totalt av i det faktum at Tord Søfteland meiner å ha lest ein stad at det skal gå direktebussar frå Luranetunet ut til konserten. Om dette seier noko om snittalderen på medlemmene i bandet eller profilen til publikummet, får artikkelforfattaren aldri heilt taket på. Noko om utdeling av teleslynger i døra finn underteikna uansett notert ned på blokka.

– Det har ikkje så mangla på oppfordringar etter comebacket på Torgfesten, fortel Moberg vidare. Då invitasjonen frå Os Live kom, kunne vi rett og slett ikkje seia nei.

Tek Fjellheim med seg til Nore Neset

På sundagens konsert vert det eit litt annleis set enn det vi fekk høyra i Os sentrum.

– Denne gongen vert det meir av det vi gjorde på Fjellhem-jobbane, fortel batterist, Rune Herheim. Om lag 15 låtar og halvannan time med show er øvd inn. Var du i si tid på festane våre i Fjellheim, kan du nok mimra deg attende - om du berre myser litt med augo. Den musikalske mimringa skal vi syta for.

– Dei har jo til og med ribbeveggar der ute, kjem det inn frå sidenlinja frå Søfteland. Nett som i Fjellheim!

Derifrå og ut kollapsar intervjuet i ein diskusjon om alle som i si tid har spelt med bandet; Karl Ole Midtbø, Steinar Lyssand - og ikkje minst kor heldig Marius Neset bør føla seg som har fått spela med sjølvaste Untouchabl(u)es!

Bente Strønen filosoferer over kor lenge dette bandet eigentleg har halde på;

– At dei to døtrene mine no er med, seier vel sitt?! Det er liksom berre å halda seg fast og bli med ein runde til.

Men ein ting fekk artikkelforfattaren tydeleg ned på blokka:

– The Untouchabl(u)es anno 2018 let sinnsjukt stort, det er gjort dønn ærleg, og det er velspelt i alle ledd. Kjem du for seint på sundag, har du på ein måte tapt litt.

Dagens versjon av bandet er: Svein Bruarøy (gitar/ vokal), Geir-Magne J. Moberg (bass), Håkon Bruarøy gitar), Frode Bjerkestrand (gitar/ vokal), Tord Søfteland (gitar/ munnspel/ vokal), Erik Brinchman Hansen (keyboards), Rune Herheim (trommer), Aina Herheim (trombone), Finn Helge Bjørnør (trompet), Halvard Lyssand (trompet), Geir Hallan (saksofon), Bente Strønen (vokal), Marita Strønen (kor), June Strønen (kor), Gina Aspenes (vokal/ kor)