Wiktor (5) tok torsk på 8 kilo i Os hamn

Bildeserie:

1 av 2

Måndag hadde Wiktor fri frå barnehagen. Han fekk ein ekstra kjekk dag med pappa Marcin Kasprowicz.

– Wiktor elskar å gå å fiska med pappaen! Vi bur i Kuvågen, men denne gongen gjekk dei ned i Os hamn. Dei har ofte fått makrell, men dette var ekstra kjekt og ny rekord for Wiktor, fortel mamma Anna Kasprowicz.

Torsken han fekk på kroken vog 8 kilo.

– Folk i området hadde sagt at dei ikkje kom til å få fisk frå den brygga, men det blei bra fangst likevel.

Rett på matfatet

Den unge storfiskaren er ikkje berre glad i å få fisk på kroken, han er også veldig glad i å eta fisk.

– Han er spesielt glad i flyndre, men no blei det torskemiddag.

Pappa Marcin jobbar som kokk på Oseana, så det blir ekstra gode måltid av fangsten.

Wiktor fekk torsken på kroken samtidig som fiskeriminister Per Sandberg besøkte ein maritim barnehage i Os. Sandberg hadde fokus på å auka konsumet av fisk i Noreg, spesielt i den oppveksande generasjonen.

Lovleg fangst

Mens det er totalforbod mot fiske innanfor grense elv-sjø, er det lov å stå rett på utsida av grensa å fiska, men berre når det er ope for laksefiske i Oselvo, og fram til 15. juli berre etter andre artar enn laks og aure.

• Les meir om reglane for fiske i Os hamn i denne artikkelen.

• Midtsiden samleside: Jakt og fiske