21 mål på 2 kampar
Nore Neset har skåra 80 mål på 9 kampar og siktar seg inn på opprykk. Her er status for 5., 6. og 7. divisjonslaga etter første haustkamp.
Samarbeidsklubbane Nore Neset og Søre Neset har hatt ein god start på hausten. Nore Neset/Søre Neset 2 speler i 7. divisjon etter Nore Neset sitt nedrykk i fjor. Dei ser ut til å vera på veg tilbake i 6. divisjon.
Nore Neset/Søre Neset 2 leiar tabellen med 24 poeng (8-0-1) etter 9 kampar. Trott 3 og Loddefjord 2 har 16 og 15 poeng på 8 kampar.
– Vi har toppkamp mot Loddefjord 2 heime til helga. Dei er dei einaste som har slått oss i år, seier spelar Paul-Kristian Haldorsen.
– Kampen er sett opp søndag, men vi prøver å framskynda den til fredag.
Nore Neset har skåra 80 mål på dei første 9 kampane. I vår vann dei blant anna 11-2, 11-0 og 14-0. Hausten starta med 10-1 borte mot Lyngbø 3.
– Arvid Rabben er ein av dei som skårer mykje for oss, men årsaka til at det går så bra er at vi har veldig mange målskårarar.
Søre Neset forbi Søfteland
I 6. divisjon ligg Søfteland og Søre Neset og knivar nær toppen av same avdeling, etter 10 rundar ligg dei på 4. og 3. plass bak Øystese 2 og Sædalen.
Søfteland opna sesongen best, vann lokaloppgjeret 3-2 heime og sto utan tap før møtet med serieleiar Sædalen i siste runde før sommarferien. Der blei det 5-2-tap på bortebane.
Hausten opna heller ikkje så bra, Søfteland spelte 1-1 borte mot Rosendal, som dei slo 6-1 heime.
Søre Neset/Nore Neset starta med tap og uavgjort, men slo blant anna Øystese 2 6-3 borte, det einaste laget Søfteland tapte for før møtet med Sædalen i vårsesongen.
Før ferien slo dei Ny Krohnborg 2 5-1, i første haustkamp blei det siger borte over Eikelandsfjorden.
Heimekampen mot Eikelandsfjorden i serieopninga enda med 1-2-tap, på bortebane i helga blei det ein solid 6-0-siger.
Tap og siger i 5. divisjon
Os 2 tapte 6-3 borte for Stord 2 før ferien. Første kamp i haust gjekk heime mot Rubbestadneset.
På bortebane blei det 1-3-tap, det blei det også på heimebane laurdag.
Lysekloster 2 tapte heile 9-0 for Trott i siste runde før ferien, men borte mot Viggo i første kamp etter ferien gjekk det betre.
Heimekampen mot Viggo enda 2-2, på bortebane halte andrelaget til Lysekloster i land ein 4-3-siger.
Os 2 ligg på 9. plass og Lysekloster 2 ligg på 5. plass på tabellen etter 12 rundar.