22 millionar til hamn og bubilparkering

Bildeserie:

1 av 1

Etter det heller mislykka forsøket med ein duvande bølgjebrytar i enden av Oseanamoloen har politikarane lært.

I budsjettframlegget til dei to posisjonspartia, Frp/H, har dei lagt inn 7 millionar i kvart av dei kommande tre åra til bølgjedemparar i Os hamn. Totalt 21 millionar kroner.

– Potensialet for å utvikla hamna er stort.

– Vi ønskjer å gjera Os hamn til ein av dei største utfartshamnene, men vi ber om at skjerminga blir skikkeleg kvalitetssikra.

– Difor ber vi om at dei tekniske løysingane med oppankring blir kvalitetssikra av to forskjellige fagmiljø før vi set i gang, fortalde ordførar Terje Søviknes (Frp), då han presenterte investeringsplanane i formannskapet.

Lukkast ein å "temma" Bjørnafjorden trur dei to partia at dette vil tilføra ny aktivitet og handel på Osøyro.

Bubilparkering på Haugsneset

Ein annan ting som kan skapa aktivitet er bubilparkering på Haugsneset.

– Vi set av 1 million til dette.

– Vi ser for oss ei lita utfylling ved molofestet og etablera ei sirkelforma bubilparkering.

– Ein må nok òg oppgradera arealet litt med beplanting og liknande.

– I tillegg må det førast fram straum og vi må sjå på moglegheiten for ein tømmestasjon for septikk, forklarte Søviknes.

Betaling for å nytta bubilparkeringa ser ein for seg å gjera med automatar på same måte som ein gjer i gjestehamna.