Årets musikar

Ingrid Søfteland Neset (17) vann både konsertoppdrag i Spania og gåvesjekk på 50.000 kroner då ho stakk av med førsteplassen i UMM.

Kjetil Vasby Bruarøyonsdag 25. nov. 2009 09:20

Ungdommens Musikkmesterskaps nasjonale del blei i år arrangert for åttande gong av Norsk kulturskoleråd, med Norske Musikklæreres Landsforbund som viktig støttespelar.

Osingen og fløytisten Ingrid Søfteland Neset fekk tredjeplass i 2007, i helga var ho i finale i Oslo igjen. Finalistane blir delt i ulike klassar, ut frå alder og type instrument.

- Vi var rundt 100 som kom til finalen, laurdag blei 80 musikarar frå alle klassane tatt ut til å spela finalekonsert sundag, fortel Ingrid til Midtsiden.no.

I «open klasse» vann ho både tittelen Årets musiker, konsertoppdrag i Bodø, Trondheim, Egersund og Spania, og ein gåvesjekk på 50.000 kroner. Pengene kjem frå Elisabeth og Knut Fures Stiftelse.

Kjøper ny fløyte
Ingrid er dottera til musikklærarane Anne Leni Søfteland og Terje Neset, paret som er kjent for å setja opp flotte konsertar og framsyningar med ungdom i Fjellheim.

- Med oppvekst i ein slik musikalsk familie har du kanskje vore innom fleire instrument?

- Ja. Eg byrja med klarinett og spelar også litt piano. Og så syng eg, fortel Ingrid.

Bror til Ingrid, Marius, er kjent som saksofonist i JazzKamikaze. Sjølv held ho fram på fløyte.

- Kva kjem premiepengane til å bli brukt til?

- Eg ønskjer meg ein ny fløyte. Du får ei veldig god fløyte for mellom 100.000 og 150.000.

Vil utanlands
Del av premien var fire konsertoppdrag, eitt av dei i Spania. Alle konsertane blir spelte neste år, men Årets musiker har førebels ikkje dato på desse.

17-åringen går nå 2. år på musikklinja på Langhaugen, og har som mål å gjera som storebror, gå vidare på musikkstudie.

- Eg vil helst til utlandet, København eller London, trur eg.

- Blir det nokre konsertar her heime før jul?

- Ja, no på laurdag skal vi spela med studentar frå Griegakademiet, i Gunnar Sævigs sal, seier Årets musiker Ingrid Søfteland Neset.

Les meir om UMM her.