Kultur | 22. okt. 2021

Banksjefane reddar jula

Dei hadde sponsa vinterbelysninga frå før, men drog på «litt» ekstra i innspurten.

Banksjefane reddar jula
Ann Kristin Thue Tveit frå Fana Sparebank og Benedikte Toftesund frå Sparebanken Vest legg kvar sine 50.000 ekstra i potten. (Foto: Pressefoto/KVB)
Kjetil Vasby Bruarøy
Kjetil Vasby Bruarøyfredag 22. okt. 2021 13:56

Torsdag fatta politikarane eit vedtak på tvers av administrasjonen sitt forslag, dermed går kommunen frå null til 300.000 kroner i støtte til ny vinterbelysning i Os sentrum.

Fjordfolk, som på vegner av Os Sentrumsforening vil investera i ein lyspakke til 650.000 kroner, hadde frå før samla inn 200.000 kroner, var strålande nøgde.

– Dette var nesten alt vi søkte om, no vil vi prøva å få inn 100.000 til så vi kan finansiera det som i utgangspunktet ligg i bestillinga, sa Marthe Kristensen etter vedtaket.

Utfordringa var at pengane måtte inn i løpet av dagen i dag.

«Treng du pengar, gå til banken»

Foredragshaldar Jim Rohn meiner du ikkje skal klaga over helsa di til venar eller låna pengar av slekt - gå til lege med kroppen din og til banken når du treng pengar.

Den vegen gjekk Fjordfolk òg. For andre gong.

– Fjordfolk forklarte situasjonen godt, og sjølv om vi frå før hadde sponsa det fine vinterlysprosjektet, forsto vi at det var avgjerande med meir pengar, og fann heldigvis 50.000 kroner til, seier banksjef i Sparebanken Vest på Os, Benedikte Toftesund.

– Det er så hyggeleg i Os sentrum før jul, og vi ville gjera vårt ytterste for at det blir minst like fin pynt i år og framover.

50.000 var til god hjelp, det var også initiativet som følgte med. Benedikte sendte nemleg ein epost til leiar for personmarknaden i Fana Sparebank, Ann Kristin Thue Tveit.

– Eit varmt lokalsamfunn

Også Fana Sparebank hadde sponsa frå før.

– Eg fekk også epost av Fjordfolk tidlegare i dag, men hadde ikkje rekt å svara før Benedikte tok kontakt. Sparebanken Vest blant dei som verkeleg har fått oss til å føla oss velkomen i Os etter nyetableringa av kontoret i august i fjor, og eg synest det er veldig fint at dei kontakta oss med dette initiativet, seier Thue Tveit.

– I oktober i fjor heldt vi eit arrangement saman i Vognhallen, «Smarte kvinner sparer selv», noko som blei eit eksempel på at samhandling er vegen til suksess. No var vi glade for initiativet, og takka ja til å vera med på at bankane tok også siste del av rekninga på vinterlysa. Vi opplever Os som eit veldig varmt lokalsamfunn, og julestemning er berre fint å vera med på å skapa.

– Vi ser verkeleg fram til tenning fredag 26. november.

Fjordfolk er på vegner av både sentrumsforeininga og dei som ferdast på Osøyro både takksame og gledeleg overraska.

– Bankane var rause allereie i den første innsamlinga. I ein hektisk innspurt, opptatt på andre oppdrag, var dette heilt fantastiske meldingar å få frå dei to lokale bankane våre, seier Marthe.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.