Båten ligg fortøydd bak busskuret på Hatvik ferjekai. I natt gjekk den ned. (Lesarbilde, tips@midtsiden.no)
Båt gjekk ned i Hatvik
Natt til søndag har ein turbåt gått ned i Hatvik. Båten låg på svai, fortøydd i land bak busskuret på ferjekaien.
– Statens vegvesen er grunneigar. Mannskap på ferjene varsla om at båten låg lågt i vatnet laurdag kveld, fortel varabrannsjef Erik Walden.
Han var sjølv ute og såg på båten, og fann ut at den flaut med grei margin, men fekk kontakt med eigar.
– Ifølgje eigar, som hadde lensa båten tidlegare på dagen, var det ikkje lekkasje, men inntak av regn som var problemet.
Gjekk ned i natt
Det regna tungt i Os laurdag kveld, noko som førte til stengte vegar også i Os. Men det skal ha vore mindre nedbør i natt.
Likevel gjekk båten ned i løpet av natta. Bildet Midtsiden har mottatt kom klokka 02.30 i natt.
– Eigar er varsla og vil prøva å få båten opp igjen i dag. Det er båteigar sitt ansvar, eventuelt grunneigar, om vi ikkje hadde funne eigar av båten, seier Walden.