Båt på rek utanfor Halhjem - skrikande mann i Dalen

Onsdag i 22-tida blei det meldt om båt på rek utanfor Halhjem.

– Seinare same kveld blei båten observert i innseglinga til ferjekaien, til fare og hinder for annan trafikk, fortel politioverbetjent Christine Grindstein.

Klokka 22.42 varsla 110-sentralen at Bjørnafjorden brann og redning rykte ut med båt for å taua. Brannvesenet har Unik-båten sin liggande nettopp ved Halhjem ferjekai.

Ingen motor, ingen skipper

Båten er ei eldre snekke med raudt skrog og kvitt overbygg.

– Det var ingen folk om bord, fortel brannsjef Eivind Hovden.

– Det er ein eldre båt utan motor, som vi har aksjonert på tidlegare.

Brannvesenet har vore ute igjen i dag og lensa den for vatn. Det er uvisst kven som er eigar.

Fann narkotika

I 23.30-tida i går blei det meldt om mykje rop og skrik frå ein person i Hegglandsdalen.

Politiet kom i kontakt med mannen, som er i 30-åra. Han blei tatt hand om av helsevesenet.

Det blei funne mindre mengder narkotika i samband med aksjonen.