Samferdsle | 23. okt. 2023

– Blendande nærlys til fare for fotgjengarar

Eit hjartesukk frå ein pappa og trafikklærar.

– Blendande nærlys til fare for fotgjengarar
Birkeland tok dette bildet då han henta sonen på trening i dag.
Kjetil Vasby Bruarøy
Kjetil Vasby Bruarøymåndag 23. okt. 2023 20:55

Vi er godt inne i den mørke årstida, og fleire ungar har hatt sine temadagar i skule og barnehage for å læra om bruk av refleks.

Men er du som bilførar god på å gjera forholda tryggare for fotgjengarar?

– Eg har fleire ungar som trener i Nore Neset idrettslag, og ser omfattande feil bruk av lys ved henting og levering, seier Thomas Birkeland.

Han legg til at han er køyrelærar, og kanskje har ekstra lett for å sjå feil.

– At bilistar står med nærlys på gjer det vanskeleg å sjå ungar og ungdom som kryssar vegen framfor bilen. Om andre har fått sine om bord og skal køyra, eller rygga, kan det fort gå gale.

– Eg har sett opptil 20 bilar stå med nærlys mens dei ventar på ungane sine.

Kvalifiserer til forelegg

Om du stoppar eller parkerer utan å skru av motoren, pliktar du å skifta til parkeringslys.

– Å stå i ro med nærlys gir 3.700 kroner i forelegg, om politiet hadde hatt kontroll, fortel Birkeland.

Den same reglen kan fint praktiserast om du stopper på ein møtestad på smal veg, for å vera høfleg med møtande trafikk.

Møtande trafikk kan få vanskar med å sjå om det er fotgjengarar eller dyr nær bilen din, om du blir ståande med nærlys på mens du ventar. Mange vil kanskje vegra seg for sjølv å ta på langlys for å få betre sikt, då du som ventar kanskje ville sett på det som uhøfleg å «blenda» ein som står og ventar på deg.

– Gjer deg kjent med bilen din

Birkeland kontakta Midtsiden i håp om at vi ville spreia bodskapen, og at det skal føra til at fleire bilistar blir flinkare til å bruka parkeringslys.

– Om du er ein som til no sjeldan eller aldri har brukt parkeringslys, ta deg tid til å bli kjent med bilen din, er hans oppmoding.

Test gjerne mens du står med fronten mot eit butikkvindauge, så du ser speglbilde av bilen.

– Feil lysbruk på bilar er saman med manglande refleksbruk blant dei mest vanlege årsakene til trafikkulykker ved køyring i mørket. Kombinerer du dei to, feil lysbruk og manglande refleks, og gjerne legg til våt vegbane, som forsterkar blendinga, så får vi utrygge forhold.

Spennande? Vil du ha ukas høgdepunkt i innboksen?

Les meir om

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.