Brit Eirin Tungeland med prisen for årets eldsjel. (Foto: Christina Forstrønen Bruarøy)
Brit Eirin Tungeland med prisen for årets eldsjel. (Foto: Christina Forstrønen Bruarøy)

Brit Tungeland får ros for takketalen

... men manus til talen hadde ho liggande i skoen.

Kjetil Vasby Bruarøy
05. januar 2020 - 15:04

Vestland fylke endte med tre prisvinnarar på Idrettsgallaen i går, to av dei er frå Bjørnafjorden kommune.

Årets lag: Anders Mol frå Strandvik (med Christian Sandlie Sørum)
Årets mannlege parautøvar: Salum Ageze Kashafali (Norna-Salhus)
Årets eldsjel: Brit Eirin Tungeland frå Os

Anders sin far, Kåre Mol, var nominert til prisen «Årets trenar». Eirik Søfteland frå Os var òg del av idrettsgallaen, som ein av dei første musikarane på scenen denne staselege kvelden.

Publikum reiste seg då Brit blei ropt opp som årets eldsjel. Berre Karsten Warholm, som fekk tre prisar, og Suzann Pettersen, som fekk heidersprisen, fekk tilsvarande ståande applaus.

• Les òg: Handballvenar hyllar Brit

Sterk tale på strak arm

Ei rørt Brit stilte utan manus, men heldt ein varm og fin tale der ho takka både andre frivillige i Os Turn, sambygdingane som har nominert og stemt ho fram, spelarane ho har trent opp gjennom åra, og ektemannen Thorleif Lund og barnebarna Tormod, Peder og Halvor «for at eg har fått lov å vera trenaren deira. Det har gjort at eg kan halda fram endå litt til».

– Hadde du ikkje førebudd nokon tale?

– Jau, eg hadde notert nokre stikkord på ein lapp, men eg hadde lappen i skoen. Brått skulle eg på scenen, det blei ikkje tid til å henta den fram, seier Brit på telefon frå Gardermoen.

Ordførar i Bjørnafjorden kommune, Trinde Lindborg (Ap), var ein av spelarane på det første laget Brit trente. Mannen hennar, Per, har familie på Rena, der han jobbar, og Trine skaffa seg billett til gallaen.

– Eg er veldig glad for at eg stilte, det var ei flott oppleving, og ei fantastisk utteljing for både Vestland fylke og den nye kommunen vår! seier Trine.

– Anders og Christian er fantastiske representantar for lagidretten, og Brit for det viktige, frivillige arbeidet som blir gjort rundtom i Idretts-Noreg. Prisen ho fekk heng svært høgt, det såg vi òg på responsen i salen. Og alle som høyrde talen hennar ser nok tydeleg at ho er ein verdig vinnar. Mange eg kjenner i salen, både politikarar og folk frå Hordaland idrettskrets kom til meg og gav ros for Brit sin takketale.

Gratulerte Warholm og takkar gjengen i klubbhuset

Sjølv synest Brit at det å vera kjendis for ei helg er akkurat lenge nok.

– Det har vore ei strålande helg med ein flott vertsskap. I kulturhuset før gallaen fekk alle vi fem finalistane overrekt diplom og ein gåvesjekk, og etter gallaen var det ein fin fest der det blei tid til å prata saman.

– No skal eg heim og sjå gallaen i opptak. Eg håper eg rakk å takka alle, og vil uansett retta ei ekstra stor takk til alle som sat samla i klubbhuset på Kuventræ. Dei har verkeleg stått på, både med å samla stemmer og å laga god stemning i heimbygda under gallaen.

• Video og bildeserie: Sjekk reaksjonane i klubbhuset!

På veg frå galla til fest fekk Brit møta sonen Kjetil med kona Ingebjørg og dei tre barnebarna.

«Eg visste det!» var det første dei sa, så fekk dei halda prisen til farmor.

Brit rakk òg å gratulera kveldens mestvinnande, Karsten Warholm. Dei to prisvinnarane har felles slekt, og har vore i nokre familiebesøk saman.

• Sjå gårsdagens sending av idrettsgallaen på NRK.no

Les meir om

Sport Handball