– Brygga er ròten

I julehelga blei det observert at ytste del av brygga utanfor bustad- og næringskvartalet Vindu mot Fjorden hadde sige saman.

Den øydelagt delen av brygga blei sperra av. I dag var redningsdykkarar frå Os brannvesen på inspeksjon.

– Heilt oppeten

– Vi utførte i dag ein kombinasjon av dykkarøving og inspeksjon, fortel brannsjef Stein Gjøsund.

Dykkarane inspiserte og filma det dei såg av brygga under vatn.

– Det var mykje material som var heilt oppeten. Det såg ikkje bra ut.

Teknisk eining overtar

Brannvesenet held no på å samla saman dokumentasjon for overlevering til teknisk eining i Os kommune.

Årsaka til at brygga, som berre er rundt 8 år gamal, no er ròten er uvisst. Feil materialbruk kan vera blant årsakene.

Om større delar av brygga blir sperra, og kven som får ansvaret med å retta opp i feilen, er førebels også uvisst.