Burger-kongen gjorde comeback

Er du gamal nok til å hugsa Silvio's, kiosken som låg ved det den gong nye bustadprosjektet Flåten Terrasse – så syntest du kanskje det var noko kjent med smaken på hamburgarane du fekk servert under Osfest.

– Ja, det er den gamle oppskrifta, stadfestar Silvio Reisch.

Det er 17 år sidan han la ned kiosken, der han serverte burgarar med si eigen unike oppskrift på kjøt og dressingar.

I helga fekk han fleire oppmodingar om å opna ny kiosk.

Selte 720 burgarar på 2 dagar

– Det har vore veldig kjekt, men eg har ingen planar om å opna kiosk igjen. Eg hadde eigentleg ingen ambisjon om å stå i grillen under Osfest, heller, men så blei det sånn at dei gav meg ansvar for maten, og då måtte vi gjera det skikkeleg.

Silvio bestilte 750 burgarar av eigen oppskrift. Søndag var det berre 30 igjen.

– Det var fantastisk å ha med Silvio på dette. Dei siste 30 burgarane steikte han då vi gjekk og rydda på plassen søndag.

– Vi håper å ha Silvio og burgarane hans med til neste år òg, dei er jo ein attraksjon i seg sjølv, seier festivalsjef Tor Egil Hylland.