Byggestopp på Lyngheim

Tidlegare i veka fortalte vi om effektivt dugnadsarbeid med reisning av lemstova på Lyngheim, men at bygget blei høgare enn kva som var godkjent.

Naboar reagerer og sa i intervju med Midtsiden at dei hadde inntrykk av at dei som bygger tunet tar seg til rette.

– Den påstanden vil eg avvisa, vi har ikkje visst at bygget blei for høgt, eller spekulert i at vi ville få tilgjeving, seier Magne Brekke.

No har dugnadsgjengen fått krav om byggestopp frå Os kommune.

– Vi har fått lov til å gjera det vi treng for å hindra at bygningen og materialar blir skadd medan det er byggestopp, så no står vi på for å sikra bygget.

– Så vil vi venta på behandling av søknaden om endra byggehøgd.

– Naboar ser ut til å vera bestemte på å klaga på ny nabovarsel, og på å følgja saka så dei får sikra utsikta si. Har de byrja å tenkja på ein plan-B?

– Nei, det har vi ikkje, vi vil avventa. Dessutan er det vanskeleg å sjå føre seg eit alternativ, poenget med prosjektet er nettopp å reisa huset i mest mogleg original stand.