Den 13. revyen sitt fjerde forsøk

I 2020 var revygruppa Nor og ne frå Skeie klare med ny revy for 13. gong, men så kom kinaviruset.

– Vi sette opp ny dato til hausten 2020 og våren 2021, men då også begge desse måtte utsetjast, våga vi ikkje prøva oss på noko hausten 2021, seier Susan Askvik.

– Men no skal det vera duka for både fullt hus og dans etterpå! Det ville ikkje vore det same å spela for 50, når vi alle desse åra har hatt så godt publikum og rundt 200 i salen.

Nor og ne har halde på tittelen frå 2020, «Regnbuerevyen» er oppfølgjaren til revy 12, «Bollé Bollé».

Her er nokre bilde frå Bollé Bollé i 2019:

Bildeserie:

1 av 7

– Vi synest vi har så mange gode sketsjar i denne at vi ikkje ville skrota den. Men noko av revyen er justert og oppdatert, og no driv vi å øver den inn. For fjerde gong.

– Vi drog bandet litt lengre inn på scenen i Bollé Bollé, i denne runden får dei ei endå meir synleg rolle, avslører Susan.

Det er lagt opp til to helger på rad med i alt fire show, laurdagane med dans og pub i Symrasalen etter revyen.

Premieren er fredag 25. mars.

– Er skodespelarane dei same som før?

– Det har jo vore litt utskifting tidlegare år, ut frå om enkelte har vore opptatt. Bjørnar Alvsvåg Folgerø er dessverre vekkreist, han har fått ein etterlengta tur til Canada. Det er synd, han er jo ungdomen vår!

– Men Linda, som ikkje var klar for 2020-revyen, er no tilbake. Også Stine, som var vekke i 2019, er med i gruppa igjen.

På scenen i 2022: Susan Askvik, Jan Helge Corneliussen, Robert Haugetun, Pål Heimtoft, Stine Fristad og Linda Nytræ.