Meining | 15. jan. 2025

Derfor er budsjettet ulovleg

DEBATT: Bjørnafjorden kommune treng politikarar som er modige nok til å ta dei naudsynte og ansvarlege grepa for å få økonomien under kontroll.

Derfor er budsjettet ulovleg
Kjetil Vasby Bruarøy
Kjetil Vasby Bruarøyonsdag 15. jan. 2025 11:46

Bjørnafjorden kommune treng politikarar som er modige nok til å ta dei naudsynte og ansvarlege grepa for å få økonomien under kontroll. I staden har vi fått ei rein ansvarsfråskriving; i form av eit ulovleg budsjett.

Bjørnafjorden SV og Bjørnafjorden MDG krev lovlegkontroll av budsjettet som fleirtalet (Frp, H, INP og KrF) vedtok før jul.

Kvifor bryt budsjettet lova?

Kommunelova krev at eit kommunebudsjett skal vere realistisk, fullstendig og oversiktleg.

Budsjettet som blei vedtatt bryt med alle desse tre krava.

Urealistisk

Dei to største budsjettpostane vi har er helse-/omsorgssektoren og oppvekstsektoren.

I fjor brukte begge meir enn budsjettert for å oppfylle lovpålagde tenester. Rammene deira er no kutta ytterlegare.

Med eit samla underskot på 150 millionar i fjor, er dette heilt urealistisk.

Tillitsvalde, fagpersonar, pårørande og opposisjonen har alle varsla om det.

I praksis har ikkje sjukeheimen eller heimetenesta anna val enn å ta inn vikarar når folk er sjuke. Skulen og barnehagen må sette inn ekstra ressursar når elevar har krav på det.

Det som burde ha vore inkludert i budsjettet, blir i staden eit meirforbruk som må takast frå ein bufferkonto som snart er tom.

Vi spør oss om fleirtalet veit kva det faktisk kostar å drive Bjørnafjorden kommune. Det er like urovekkjande anten svaret er ja eller nei.

Ufullstendig og uoversiktleg

Budsjettet finansierer ikkje dei lovpålagde tenestene, og det inneheld kutt som manglar forklaring eller konsekvensutgreiing.

Einingane har ikkje eingong fått vurdere om kutta let seg gjennomføre.

Dermed får ikkje du som innbyggjar vite korleis endringane treff deg.

Blir tenester som du eller dine kjære er avhengige av ramma? Korleis blir bemanninga på skulen og i barnehagen? Skal vi legge ned skular og legevakt likevel?

Korkje fleirtalet eller administrasjonen kan svare på desse spørsmåla.

Høyringsrunden blir då eit spel for galleriet. Frå eit lokaldemokratisk perspektiv er det djupt problematisk.

Dette er ikkje politisk ueinigheit - det er brot på grunnleggande lovkrav som er der for å verne innbyggjarane sine interesser.

Difor krev vi no lovlegkontroll.

Bjørnafjorden SV ved gruppeleiar Asle Olsen, kommunestyrerepresentant Hege Bjørnør og lokallagsleiar Craig Russell Lundervik Bøthun

Bjørnafjorden MDG ved gruppeleiar Nils-Anders Nøttseter og lokallagsleiar Trine Hofsvik Strønen

Spennande? Vil du ha ukas høgdepunkt i innboksen?

Les meir om

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.