– Det blir midtre trasé

Samferdselsministeren Ketil Solvik-Olsen (Frp) orienterte fredag morgon samarbeidsrådet for Sunnhordland, Os kommune og Hordaland Fylkeskommune om regjeringa si beslutning om ferjefri kyststamveg E-39.

– Regjeringa har beslutta at E-39 skal gå etter midtre trasé med bru over Bjørnafjorden.

– Kor den skal koma i land er ikkje bestemt enno. Det må koma i det vidare arbeidet, fortalde samferdselsministeren.

Fire punkt

I brevet til vegdirektoratet listar ministeren opp fire punkt:

– Det skal jobbast etter midtre trasé.

– Det skal nyttast statleg plan etter plan- og bygningslova. Dette gjer vi for å sikra framdriften.

– Det skal leggast tilrette for minst mogleg konflikt med omsyn til natur og kulturminne.

– Det skal leggast til grunn god dialog med lokale mynde.

Førebudd på debatt

Samferdselsministaren la ikkje skjul på at det kunne koma konfliktar i samband med avgjersla.

– Slik er det. Nokon blir nøgde, andre blir det ikkje.

– Konfliktsnivået blir ikkje mindre om ein utset avgjersla eit år eller to.

– E-39 er det viktigaste samferdsleprosjektet på Vestlandet.

– VI meiner det midtre alternativet er det mest fornuftige å gå vidare med og at det er veldig godt utgreia.

– Kor fort kan brua koma?

– Eg har ikkje lyst til å lova noko dato, men vi vil ha raskare framdrift enn det den forrige regjeringa la opp til, fortalde Ketil Solvik-Olsen til Midtsiden.